霸戲哥之日常#367｜ 燒肉的味道

霸戲哥自細對豬肉麻麻，唯獨鍾情燒豬，所以細個最鍾意去兩種場合—婚宴同拜山，咪就係為咗食乳豬同燒肉囉。當然敗家如我，都鍾意食酒樓嘅燒腩仔，但因為太貴，唔到你話想食就有。依家每次食燒腩仔，都會感受到霸戲媽嘅皇恩浩蕩，係滿足的味道。

一嚿平平無奇又唾手可得嘅燒肉，背後原來有好大學問。黎諾懿主持嘅飲食節目《滿足的味道》噚晚播出第一集，主題就係講燒肉。燒肉好唔好，基本上睇賣相已經知，而點解老字號嘅燒肉店咁多年味道始終如一？除咗食材，最重要就係烹調方法。

黎諾懿帶觀眾走訪幾間老字號，睇吓啲師傅點樣整燒豬。原來要燒到變「芝麻皮」，就一定要喺320度高溫爐燒，最傳統做法係用炭燒，但因為要領牌，所以炭燒嘅燒肉已經買少見少。

最可惜係，已經冇乜新人肯入行，因為燒豬實在太辛苦，晨早五點起身開爐不得止，又要企喺熱爐側邊左轉右轉，最慘就係年終無休。

依家每食到好味嘅燒豬都要感恩，或者以後冇機會再食到呢種味道。

霸戲哥

** 博客文章文責自負,不代表本公司立場 **

Netflix已經由「動漫台」變成「奇案台」，全球各地大小複雜奇案，遲早都會畀N記製作成紀錄片。呢類奇案片或者滿足到部份觀眾嘅獵奇心態，但同時都有令人極度不安嘅能耐，奉勭大家心情差時千祈咪睇。

最新一齣令人情緒低落嘅犯罪紀錄片叫《終極網絡渣男》，故事圍繞美國一名混球Hunter Moore嘅「渣」行，同埋受害者嘅遭遇。Hunter被冠為「網上最討厭男人」，佢2010年經營一個名為「Is Anyone Up?」嘅色情網站，起初係畀啲分手情侶發淫照報仇嘅平台，慢慢演變成欺凌同性勒索（Sextortion）嘅網站。Hunter利用網民嘅好奇心同獵奇心，不停散佈淫照同淫片，大部份都係未經當事人同意。情形有多少似轟動韓國嘅「N號房事件」。

除咗Hunter嘅獸行令人反感之外，套紀錄片仲有好多令人不安嘅影片，霸戲哥越睇越嬲，更加唔明點解啲女仔咁愚蠢，任由啲渣男擺佈。

都係嗰句，做女仔一定要學識保護自己。