霸戲哥之日常#369｜ 鮑姐

有日收工返家，豬視妹煞有介事同霸戲哥講，話Netflix有套新戲非睇不可，因為有鮑姐做主角。講到咁激，又身為亞視之友嘅我，點可以唔睇？

套戲叫《一家之主》，係鮑姐極罕參與嘅台灣片，記憶中一啲都唔新。翻查資料，套戲原來喺2018年拍完，原定上年上映，但又係因為疫情關係打亂部署。直至近日N記買咗串流播放權，香港觀眾終於有得睇。

電影屬於家庭倫理片，講述鮑姐係多重身份，全能媽媽、盡責妻子同孝順女兒。鮑姐每日貢獻所有時間處理家頭細務，包辦一日三餐、打掃、做老公嘅出氣袋等等，仲有份教美術嘅正職。只有等屋企人瞓晒覺，鮑姐先有私人時間睇下電視。好明顯，套戲想探討台灣中年女人，所面對嘅家庭問題。

呢類賢妻良母其實好蝦人演。楊紫瓊就略嫌太霸氣；葉德孄又太過精打細算，唯獨鮑姐先有呢份獨特氣質，少少學識、少少傻氣，又有親和力，導演王希捷搵啱人選。

睇完齣戲，平日完全唔理家務嘅霸戲哥，多少都有啲慚愧同內疚。睇嚟豬視妹生日，霸戲哥都要好好獎勵佢。

霸戲哥

** 博客文章文責自負,不代表本公司立場 **

唔經唔覺，奶仔方紹聰主持嘅《貧窮限制想像》今晚嚟到最後一集，呢兩個幾月入面，霸戲哥嘅想像力係豐富咗，可惜荷包依舊係薄切切。

成日話男人最愛三樣嘢：名車、名錶、女人。頭兩樣霸戲哥都唔好，女人有豬視妹一個已經嫌多，又或者可能貧窮限制咗想像啦。而最後一集，奶仔就帶觀眾玩名錶同名車。

陀飛輪大家聽得多，其實陀飛輪即係咩？陀飛輪係法文Tourbillon嘅音譯，係瑞士鐘錶大師Abraham-Louis Breguet喺1975年發明嘅鐘錶調查裝置。普通嘅機械錶，因為會受到金屬疲勞同地心吸力嘅影響，會造成誤差。陀飛輪有螺旋調速結構，年誤差係少於1秒。不過表芯原材料同啲機件好多都係瑞士原產，閒閒哋都百萬起標，窮L又點玩得起。

霸戲哥認為戴錶只得兩個用途——睇時間、同埋睇notification，所以幾千蚊隻Apple Watch已經夠做。至於啲人炒撈都可以致富，霸戲哥真係冇呢個本事嘞。