霸戲哥之日常#377｜ 香港同志影展

「第33屆香港同志影展」（HKLGFF）將於9月17日至10月1日舉行，今日喺高先戲院開始賣飛。

全球各地都有唔少同志影展，較出名嘅好似聖地牙哥亞洲影展、台灣酷兒國際影展同舊金山國際同志影展。香港呢個由林奕華、博偉達喺1989年創辦，係全亞洲歷史最悠久嘅同志影展，規模絕對唔比外國嘅遜色。

今年總共有28部長片同4部短片放映，而今屆焦點導演係雲翔，共選映四齣佢嘅重要作品，包括兩齣從未喺香港曝光嘅《屍房菜》同《十三門徒》，同兩齣舊作《永久居留》同《安非他命》。

雲翔兄絕對係香港同志電影嘅一個重要人物，佢嘅作品大膽、坦誠，唔止喺香港，喺世界各地都一樣咁舉足輕重。霸戲哥當年有幸訪問過雲翔兄，每次都感受到佢對電影嘅鍾愛同熱情，同埋無懼世俗眼光嘅豁達。

香港同志影展成立嘅目的，其實係借電影向大眾宣揚平等機會嘅重要性，當然亦想消除大眾對不同性向人士嘅歧視同誤解。所以唔應該只係LGBT人士入場，普通人更應該要支持同感受。

霸戲哥

** 博客文章文責自負,不代表本公司立場 **

呢兩星期班波友不停傳來惡搞圖，配上「咪一X樣」字句，揶揄曼聯換變個領隊都好，結果都係一樣。開局連輸兩場，仲要輸畀中游嘅白禮頓同升班馬賓福特，依家積分榜排包尾，認真羞家。

今夜凌晨上演今季英超第一場雙紅會，主場迎戰上屆亞軍利物浦，睇怕都凶多吉少。往年雙紅會，一街都係波衫佬，今年曼迷忽然低調，慌死畀人知佢哋曾經喺巴士頂高呼「魚拉突」。

霸戲哥係熱刺迷，對兩隊波都冇乜感覺。但豬視妹都係「魚拉突」粉絲，都唔想睇住佢偷偷哭波喪。至於你問曼聯有咩策略突圍？依霸戲哥愚見，曼聯唔能夠好似中游球隊泊大巴死守，因為有麥麥送嘅後防線絕對係計時炸彈。至於想用高位迫搶嘅體力打法，就唔能夠出C朗，唔係話佢體能做唔到，係浪費咗佢進攻嘅體力。另外中場線我極唔建議用B費，條友鬧隊友嘅氣力仲多過去搶波。

對利物浦取勝嘅方法，霸戲哥認為只可以孤注一擲，對攻快打快，上半場盡出後生仔，以高位迫搶打亂利物浦行軍節奏，伺機偷雞，上半場目標係和波。下半場再放C朗出嚟，用兩翼側擊博混亂，體力充沛嘅C朗係贏波關鍵。

霸戲哥亂噏就叻，真係執行嘅，都係嗰句—「咪一X樣」。