霸戲哥之日常#374｜ 吸血鬼

星期日悶悶哋，最適宜睇返齣冇乜養分嘅爽片，等個腦袋休息下。霸戲哥喺Netflix搵到套由Jamie Foxx主演嘅《扮工獵人》（Day Shift），睇戲名就知應該唔使點用腦。

故事背景設定喺一個人類同吸血鬼共存嘅世界。Jamie係吸血鬼獵人，因為唔跟規矩做嘢，多次被逐出公會，生活拮据。為籌錢畀妻女，Jamie低頭做人，被安排做日更苦差。係咪好多打工仔嘅寫照呢？

荷李活喪屍片泛濫，但講吸血鬼竟然唔多，明明吸血鬼、人狼同喪屍應該分庭抗禮。唔睇套戲唔知吸血鬼原來好堅揍，打極唔死仲識功夫，唔似啲喪屍一劈就散。

你唔好expect套戲故仔好吸引嘞，但動作設計講真係有心思嘅。導演係參與過《殺神》、《狂野時速》嘅J.J. Perry，唔怪得Jamie都話好多場面係前所未有。

個人認為呢套唔伏，可以一看。

霸戲哥

** 博客文章文責自負,不代表本公司立場 **

噚日終於得閒睇咗黃浩然套《緣路山旮旯》。套戲係近年少有嘅愛情輕鬆小品，觀眾唔難搵到自己想要嘅定位，係有訊號同connect到嘅。

至於霸戲哥極之欣賞嘅岑珈其，就算「一王五后」都孭到飛。我問過豬視妹，佢話呢類仆心仆命嘅戇直暖男，喺現實世界都好有market，媾到女神一啲都唔奇啫。

愛情當然唔可以用距離嚟衡量，但如果霸戲哥有得揀，寧願揀沙頭角之花，都未必揀大澳女神。大澳真係太山旮旯啦！

不過遠還遠，大澳都畀過霸戲哥唔少回憶。撇除晨咁早趕入東涌搭綠van、同被迫行轉到頭暈嘅山路之外，整個大澳體驗都算係美好嘅。指定動作諸如睇日落，食炭爐雞蛋仔、豆花同即炸沙翁就梗唔少得，但大澳其實仲有好多文化故事去發掘，早年跟黃Sir同班學生做導賞，都了解咗唔少大澳歷史。

咁橋霸戲哥同豬視妹下星期一會入大澳玩，唔知會唔會搭船出海睇白海豚呢？