霸戲哥之日常#373｜ 與大澳的距離

噚日終於得閒睇咗黃浩然套《緣路山旮旯》。套戲係近年少有嘅愛情輕鬆小品，觀眾唔難搵到自己想要嘅定位，係有訊號同connect到嘅。

至於霸戲哥極之欣賞嘅岑珈其，就算「一王五后」都孭到飛。我問過豬視妹，佢話呢類仆心仆命嘅戇直暖男，喺現實世界都好有market，媾到女神一啲都唔奇啫。

愛情當然唔可以用距離嚟衡量，但如果霸戲哥有得揀，寧願揀沙頭角之花，都未必揀大澳女神。大澳真係太山旮旯啦！

不過遠還遠，大澳都畀過霸戲哥唔少回憶。撇除晨咁早趕入東涌搭綠van、同被迫行轉到頭暈嘅山路之外，整個大澳體驗都算係美好嘅。指定動作諸如睇日落，食炭爐雞蛋仔、豆花同即炸沙翁就梗唔少得，但大澳其實仲有好多文化故事去發掘，早年跟黃Sir同班學生做導賞，都了解咗唔少大澳歷史。

咁橋霸戲哥同豬視妹下星期一會入大澳玩，唔知會唔會搭船出海睇白海豚呢？

霸戲哥

** 博客文章文責自負,不代表本公司立場 **

說來慚愧，霸戲哥原來好耐冇約霸戲爸飲茶，今日咁啱要返老家搵番份文件，就順道幫襯樓下間酒樓。

好日唔返屋企，一開門已見雜物堆積如山。冇辦法，老一輩嘅人有鋪儲物癮，自己嘅嘢唔捨得掉，又鍾意儲埋晒啲冇用嘅嘢，久而久之，就儲到成屋雜物。霸戲哥再過一排唔返嚟，份份鐘畀鄰居投訴，陣間上埋《東張西望》就唔好啦。

霸戲哥舊居其實都幾四正架，位置港島東區沿岸，附近商場林立，交通方便，如果間屋執靚少少，中產家庭都未必租得起。所以，霸戲哥成日都想把心一橫將舊居大裝修，話晒間屋都有30年冇裝修過，只係唔知點同霸戲爸開口啫。

如果霸戲哥身處美國，或者會寫信叫Danielle Brooks幫拖，將舊居極速改頭換面。最近上架嘅Netflix實景真人騷《快趣夢想家居》，節目團隊就係專門幫人改造家居，仲要喺12小時內，喺神不知鬼不覺咁徹底翻新。呢條team人才輩出，木工、技工、室內設計師、室外設計師、打氣師都有，佢哋由地台開始到屋頂，將舊屋上上下下分解再裝嵌。睇到前後對比照，真係極之治癒。

諗諗吓，不如叫霸戲爸睇吓個節目，話唔定佢都心思思想將屋企嚟個大翻新？