霸戲哥之日常#372｜ 大裝修

說來慚愧，霸戲哥原來好耐冇約霸戲爸飲茶，今日咁啱要返老家搵番份文件，就順道幫襯樓下間酒樓。

好日唔返屋企，一開門已見雜物堆積如山。冇辦法，老一輩嘅人有鋪儲物癮，自己嘅嘢唔捨得掉，又鍾意儲埋晒啲冇用嘅嘢，久而久之，就儲到成屋雜物。霸戲哥再過一排唔返嚟，份份鐘畀鄰居投訴，陣間上埋《東張西望》就唔好啦。

霸戲哥舊居其實都幾四正架，位置港島東區沿岸，附近商場林立，交通方便，如果間屋執靚少少，中產家庭都未必租得起。所以，霸戲哥成日都想把心一橫將舊居大裝修，話晒間屋都有30年冇裝修過，只係唔知點同霸戲爸開口啫。

如果霸戲哥身處美國，或者會寫信叫Danielle Brooks幫拖，將舊居極速改頭換面。最近上架嘅Netflix實景真人騷《快趣夢想家居》，節目團隊就係專門幫人改造家居，仲要喺12小時內，喺神不知鬼不覺咁徹底翻新。呢條team人才輩出，木工、技工、室內設計師、室外設計師、打氣師都有，佢哋由地台開始到屋頂，將舊屋上上下下分解再裝嵌。睇到前後對比照，真係極之治癒。

諗諗吓，不如叫霸戲爸睇吓個節目，話唔定佢都心思思想將屋企嚟個大翻新？

霸戲哥

** 博客文章文責自負,不代表本公司立場 **

黃Sir係雲吞麵癡。全港九只要有賣雲吞麵嘅舖頭（包括一粥麵），佢都必定光顧過。網上嘅雲吞麵關注組，如果要請食評專家，黃Sir一定係最有資格。

因為黃Sir關係，霸戲哥亦有幸品嚐過唔少雲吞麵名店，好似麥文、麥奀、麥兆、沾仔記統統食勻，勉勉強強都可以扮吓專家。

雲吞麵又叫作餛飩麵，按分量分大蓉、中蓉同細蓉，窮人食細蓉居多，所以又成為雲吞麵別稱。

人地話雲吞麵最重要三樣嘢：麵底、湯頭同雲吞料。霸戲哥認為應有次序之分，湯頭先係一碗雲吞麵嘅靈魂。至於湯頭點為之好？有啲雲吞麵舖一味落大地魚去熬，結果湯頭帶腥，仲有層黏黏哋嘅膠質，失敗。有啲就加味精同胡椒，結果湯頭變「死鹹」，食完仲鬼咁口渴，失敗中嘅失敗。

好嘅湯頭，一定要用蝦籽、大地魚同豬骨用慢火去熬，湯色要清澈，而重中之重係適量嘅韮黃。冇韮黃嘅雲吞麵基本上可以blacklist。

霸戲哥出世遲，冇經歷過《花樣年華》蘇麗珍拎住暖壺買雲吞麵消夜嘅日子，但細過食嘅第一碗雲吞麵都仲記得，就係喺灣仔近鵝頸橋嘅大排檔，時為五蚊一碗。

噚晚嗰集《滿足的味道》黎諾懿就係介紹雲吞麵，大家得閒可以上myTV Super重溫。