霸戲哥之日常#381｜ 可可西里

第一次聽可可西里呢個名，應該係陸川導演拍嘅同名電影，套戲講乜已經唔記得，淨係知劇組踩上海拔 4700米嘅高原上拍攝，克服重重困難先拍得成。最終捧走金馬獎最佳劇情片。

可可西里位於青藍高原東北部，佢同羅布泊、羌塘、阿爾金山，合稱中國四大無人區，由於天氣極之嚴峻惡劣，人跡罕至，結果成為野生動物好似藏羚羊同雪狼嘅天堂，同埋藏羚羊盜獵者嘅作惡之地。

今晚翡翠台推出由陳貝兒主持嘅新節目《無窮之路 II—無價之保》，首兩集就係探訪有「生命的禁區」之稱嘅可可西里，了解呢度嘅人點樣克服惡劣天氣，守護住呢片淨土。　

喺海拔4700米高原拍攝，某程度上係搵命博，結果陳貝兒因為缺氧同吹咗陣強風，一度患上急性失溫症。可想而知，全天候喺度居住嘅人，係幾咁艱苦。

霸戲哥相信呢齣《無窮之路 II—無價之保》會係水準之作，睇完應該會有所反思同感受。

霸戲哥

** 博客文章文責自負,不代表本公司立場 **

強烈熱帶風暴「馬鞍」越吹越西，原本路線食正香港，依家偏離軌道，風勢比之前預測嘅弱得多。天文台勉強掛個八號風球，滿足吓打工仔咁啦。但「馬鞍」來去匆匆，聽朝隨時變返三號波，大家記得準時返工。

每當掛起八號波，大家匿喺屋企無所事事，最鍾意就係睇突發風暴消息。記憶中，上一代嘅天氣報道員比較錫身，一切以安全行先。由唔知邊年開始，報道員要充當埋風力探測器，觀眾先至睇得過癮，咁就有收視保證。

以往天氣報道員只會喺碼頭測風，最常見就係去尖沙嘴天星碼頭，貪就腳。但自從有年杏花邨出現躉船撞防坡堤意外，杏花邨就成為颱風熱點，電視台報道員一定全天候standby。到後來「天鴿」同「山竹」來襲，又真係搞到浸咗成個杏花邨停車場，杏花邨同颱風就此永久連繫。

實不相暪，霸戲哥細細個就係住喺杏花邨，經歷過無數次八號波。但其實杏花邨唔係外界想像咁大風，只不過係近海啫。如果講「食得應」，點計都係藍灣半島應好多。藍灣成日爆玻璃，大家又幾時見杏花邨爆？提議電視台報道員可以考慮「轉場」，保證有新體驗。

講住咁多先，因為霸戲哥要做番香港人最鍾意喺颱風做嘅嘢——就係落便利店囤積零食嘞。