霸戲哥之日常#380｜ 八號波雜談

強烈熱帶風暴「馬鞍」越吹越西，原本路線食正香港，依家偏離軌道，風勢比之前預測嘅弱得多。天文台勉強掛個八號風球，滿足吓打工仔咁啦。但「馬鞍」來去匆匆，聽朝隨時變返三號波，大家記得準時返工。

每當掛起八號波，大家匿喺屋企無所事事，最鍾意就係睇突發風暴消息。記憶中，上一代嘅天氣報道員比較錫身，一切以安全行先。由唔知邊年開始，報道員要充當埋風力探測器，觀眾先至睇得過癮，咁就有收視保證。

以往天氣報道員只會喺碼頭測風，最常見就係去尖沙嘴天星碼頭，貪就腳。但自從有年杏花邨出現躉船撞防坡堤意外，杏花邨就成為颱風熱點，電視台報道員一定全天候standby。到後來「天鴿」同「山竹」來襲，又真係搞到浸咗成個杏花邨停車場，杏花邨同颱風就此永久連繫。

實不相暪，霸戲哥細細個就係住喺杏花邨，經歷過無數次八號波。但其實杏花邨唔係外界想像咁大風，只不過係近海啫。如果講「食得應」，點計都係藍灣半島應好多。藍灣成日爆玻璃，大家又幾時見杏花邨爆？提議電視台報道員可以考慮「轉場」，保證有新體驗。

講住咁多先，因為霸戲哥要做番香港人最鍾意喺颱風做嘅嘢——就係落便利店囤積零食嘞。

霸戲哥

** 博客文章文責自負,不代表本公司立場 **

滿足的味道，霸戲哥認為唔一定要光顧米芝連三星，又或者嘆嚐絕世佳餚。相反，幫襯越貴嘅食肆（尤其窮人），通常餐飲體驗都越差，正是貼錢買難受，又何來滿足？

噚晚嗰集《滿足的味道》主題係點心，咁啱黎諾懿介紹一間西環茶樓，勾起好多大學時期嘅瘋狂回憶。

霸戲哥嘅大學生活，只可以用荒唐兩個字嚟形容。因為住Hall冇王管關係，作息混亂、日夜顛倒唔在講，最離譜係喺球場嘅時間，遠遠超過喺lecture room。嗰個年頭，大學生係天之驕子，真係求其hea住都碌過。

當時嘅U life，其實都幾「規律」。夜晚六點起身食「早餐」，之後打AOE同Diablo2，中間天九打幾口莊，贏錢就吹雞飲早茶。最後天光練早波再返hall大覺瞓。轉眼就玩咗人生最美好嘅三年。

至於幫襯嘅茶樓，來來去去得兩間，一間喺薄扶林村，另一間就喺西環電車路近街角位。兩間茶樓嘅點心，其實味道都好一般，但偏偏我哋呢班Kong U仔，就係貪佢浸懷舊味同人情味，喺其他地方永遠食唔到。諗番轉頭，呢啲咪就係滿足嘅味道囉。

事隔廿幾年，好多嘢都唔同晒，莫講話茶樓唔見咗，依家嘅hall life都好唔一樣。至於當年嘅「茶腳」，有啲已經遠走他鄉，有啲已經不相往來，諗起都有啲欷歔。