博客文章
呢排每日平均接10個促銷電話，有大灣區物業推介、有低息貸款、有MPF協助，裝咗小熊來電都擋唔晒。而每100個呢啲電話入面，就會有1個叫你去「拎緊急郵件」，霸戲哥無聊起上嚟，有時都會陪佢玩番半個鐘，直至對方投降cut線為止。
一日仲有電騙，就證明依然有傻人落叠。咪以為受騙嘅一定冇乜學識，大把傻人飽讀詩書，一樣係腦囟都未生埋。一句到尾，點都係衰貪心，先會畀人呃，又或者畀人揸到痛腳啫。
要杜絕騙徒，加強教育同宣傳都係一個方法。今晚嗰集《愛回家》就夠晒特別，因為加插咗唔少防騙訊息，而保安局仲破天荒向全體公務員發放訊息，叫同事今晚睇《愛回家》，因為片尾仲有保安局副局長粉墨登場，呼籲大家小心求職陷阱，唔好諗住搵快錢，最後畀人賣豬仔去東南亞。
霸戲哥從來擔屎唔偷食，想呃我嘅機會係零。不過，今晚就畀保安局呃咗入去睇《愛回家》囉。
霸戲哥
** 博客文章文責自負,不代表本公司立場 **
從來覺得孖生子女充滿神秘，喺生物學角度，雖然佢哋係獨立嘅生命個體，亦擁有獨立行為同思考模式，但仍有少撮人包括霸戲哥，硬係覺得佢哋識得心靈感應。
細個成日諗，孖生最着數，因為喺學校犯事，只要死口唔認，老師都係冇佢哋符。到今日科技咁進步，但人工智能仍未能準確辨認孖生，咁如果兩人身份互換，理論上又work唔work呢？
Netflix最近有齣懸疑劇《無聲回音》上架，就係講一對孖生姊妹Leni同Gina（由Michelle Monaghan分飾）身份互換嘅故仔。兩人每隔一年就互換一次身份，家庭、財產、身份、甚至丈夫都可以共享，至於犯事呢？就兩個都唔認帳囉。
呢齣燒腦劇出奇地幾吸引我，佢勁在你一路睇，一路都搞唔清你睇緊嗰個係Leni定Gina，變相你冇得代入角色去思考個套路，一味跟住導演引導你嘅方向去探索。劇情有少少似早排無綫套《雙生陌生人》。
呢種身份互換嘅唯一壞處，就係你無時無刻都活喺謊言之中，到有一日，你連自己嘅身份都混淆埋。究竟係一生過兩種生活，定還是一生白過，就睇你自己嘅選擇。
