霸戲哥之日常#388｜ 孖生迷思

從來覺得孖生子女充滿神秘，喺生物學角度，雖然佢哋係獨立嘅生命個體，亦擁有獨立行為同思考模式，但仍有少撮人包括霸戲哥，硬係覺得佢哋識得心靈感應。

細個成日諗，孖生最着數，因為喺學校犯事，只要死口唔認，老師都係冇佢哋符。到今日科技咁進步，但人工智能仍未能準確辨認孖生，咁如果兩人身份互換，理論上又work唔work呢？

Netflix最近有齣懸疑劇《無聲回音》上架，就係講一對孖生姊妹Leni同Gina（由Michelle Monaghan分飾）身份互換嘅故仔。兩人每隔一年就互換一次身份，家庭、財產、身份、甚至丈夫都可以共享，至於犯事呢？就兩個都唔認帳囉。

呢齣燒腦劇出奇地幾吸引我，佢勁在你一路睇，一路都搞唔清你睇緊嗰個係Leni定Gina，變相你冇得代入角色去思考個套路，一味跟住導演引導你嘅方向去探索。劇情有少少似早排無綫套《雙生陌生人》。

呢種身份互換嘅唯一壞處，就係你無時無刻都活喺謊言之中，到有一日，你連自己嘅身份都混淆埋。究竟係一生過兩種生活，定還是一生白過，就睇你自己嘅選擇。

霸戲哥

** 博客文章文責自負,不代表本公司立場 **

Netflix客戶流失，高層諗計開源節流，大刀闊斧cut咗啲無謂嘅project，好似坊間一致劣評嘅《Resident Evil》，就唔會有第二季嘞。另一方面，之前傳過話會推出廣告plan，以低月費吸引訂戶「回鍋」，霸戲哥聽聞好似有啲眉目。

據《彭博社》稱，新廉價廣告plan將會喺年底推出，並率先係6個國家推出，每月收費為54至70蚊，但每小時嘅片，觀眾要硬食共四分鐘嘅強制廣告，喺節目開始之前同中間播放，冇得撳交叉略過。

呢啲彈出彈入嘅廣告，唔知霸戲哥係咪有強迫症，係一秒都零容忍，所以就算Netflix第日加價，霸戲哥寧願畀多啲，都要確保廣告清零。

所以Netflix呢個廣告plan係咪真係work？有冇人真係為咗平少少而硬食廣告？霸戲哥真係好懷疑。Anyway，放長雙眼睇啦。