博客文章
早兩日霸戲哥又翻睇《賭俠1999》，張家輝帶埋劉華去婚宴搵食嗰幕，真係睇一次笑一次。
以前啲人真係好鍾意搞宴會，結婚又搞、滿月又搞，後來仲整埋百日宴添，可能計落圍到本啦，但都養埋唔少好似張家輝呢類「我識佢老婆多啲」嘅白撞友。
但如果白撞嗰個係奇洛李維斯呢？
話說近日喺英國有對準夫婦，喺酒吧撞到奇洛，就隨口噏邀請對方參加婚禮。講真三唔識七又咁唐突，換轉你係奇洛，相信都會敷衍對方了事。點知奇洛真係去咗個婚禮，仲同主人家影相添。兩位新人開心到見牙唔見眼，當攝影師叫大家「Say Cheese」，班友開心到大叫「Speed」（《生死時速》），氹到奇洛笑得仲開心。
聽聞奇洛都唔係第一次做wedding crasher，只要你夠膽開聲，奇洛都幾乎有求必應。
咁好嘅人喺邊度搵？
霸戲哥
** 博客文章文責自負,不代表本公司立場 **
颱風「馬鞍」襲港時間唔合時，打工仔坐定粒六以為可以唞番個半晝，點知最後都要準時返工，士氣跌到落谷底。好唔容易捱到周末，終於可以鬆一鬆。
霸戲哥誠意推介Netflix一齣冷門嘢，就係《輕鬆小熊：主題樂園大冒險》！我知，套嘢其實係畀細蚊仔睇，但成年人一樣搵到樂趣，尤其攤喺梳化睇係極之療癒，唔覺唔覺就渡過咗成個晏晝。
霸戲哥同豬視妹夾公仔，成日都夾到鬆弛熊，但到今日先知原來啡色同白色原來係兩隻熊嚟。啡色嗰隻先係鬆弛熊，性格懶洋洋，懶到連表情都係來來去去幾個；白色嗰隻叫小白熊，鍾意惡作劇。仲有隻小黃雞，性格有點煩膠。
有時真係不得不佩服啲日本仔，能夠將平平無奇嘅角色，變成大熱商品。我諗主要係因為佢哋個樣夠晒懶散，完全符合近年提倡嘅躺平主義。
做人有時都要好似鬆弛熊咁，唔使咁認真同執着嘅，懶吓懶吓有一day，你都咪話唔爽。
