霸戲哥之日常#384｜ 鬆弛熊

颱風「馬鞍」襲港時間唔合時，打工仔坐定粒六以為可以唞番個半晝，點知最後都要準時返工，士氣跌到落谷底。好唔容易捱到周末，終於可以鬆一鬆。

霸戲哥誠意推介Netflix一齣冷門嘢，就係《輕鬆小熊：主題樂園大冒險》！我知，套嘢其實係畀細蚊仔睇，但成年人一樣搵到樂趣，尤其攤喺梳化睇係極之療癒，唔覺唔覺就渡過咗成個晏晝。

霸戲哥同豬視妹夾公仔，成日都夾到鬆弛熊，但到今日先知原來啡色同白色原來係兩隻熊嚟。啡色嗰隻先係鬆弛熊，性格懶洋洋，懶到連表情都係來來去去幾個；白色嗰隻叫小白熊，鍾意惡作劇。仲有隻小黃雞，性格有點煩膠。

有時真係不得不佩服啲日本仔，能夠將平平無奇嘅角色，變成大熱商品。我諗主要係因為佢哋個樣夠晒懶散，完全符合近年提倡嘅躺平主義。

做人有時都要好似鬆弛熊咁，唔使咁認真同執着嘅，懶吓懶吓有一day，你都咪話唔爽。

霸戲哥

** 博客文章文責自負,不代表本公司立場 **

J2新節目《邊度都有外星人》今晚登場，以《邊度都有陰謀》原班人馬陸永同鄭子誠主持，仲有外星文明研究者Tecki做嘉賓主持，第一集主題就係圍繞近年名字響噹噹嘅Nikola Tesla。點解係佢？因為根據FBI嘅絕密檔案（Nikola Tesla Part03 of03），話Tesla其實來自金星……

細過睇嗰啲咩百大偉人故仔書，愛迪生經常榜上有名，偏偏就冇乜點提Tesla。直至電動汽車公司用咗佢個名，大眾先至將Tesla掛喺口邊。

生於1856年嘅Tesla，可以話係最接近神嘅天才發明家。畢生超過700件發明，超出同期水平300年。單單是交流電呢項技術，就已經造福咗全球幾十億人。另一項偉大發明，就係無線電，今日我哋能夠享用智能手機、電腦、GPS、衞星系統，統統都係靠呢項技術。

再數下Tesla嘅其他發明：人造閃電、感應電動機、變壓器、X-ray、收音機、
霓虹燈，每一樣都嚇得死人，好難唔相信佢係來自外星。

想知道多啲Tesla嘅神秘事蹟，今晚11點一齊睇《邊度都有外星人》。