新地（0016）昨日公布中期業績時突然宣布發「輪」，以送紅輪的方式出現，按「12股派1」比例，向股東發行紅利認股權證。
方法係新地股東每持有12股新地，可獲派送1份紅利認股證，認股證年期兩年，持有人可於預期發行認股權證當日（預期為本年4月23日）至發行認股權證當日起計兩年（預期為2016年4月22日）期間，按初步認購價98.6元以現金認購1股新股份。認購價較昨日收市價99.15元，折讓約0.55%。
若悉數獲行使，新地將因此發行新股佔公司經擴大後股本約7.69%，集資金額約222.2億元。
新地兩大話事人炳江和炳聯都話會行使認股證供股，但係指唔知大佬炳湘供唔供。
新地咁派紅利輪22年無做過，話要集資在港投地，又唔覺新地好積極投地。小股東唔想供股可以沽輪賺錢，但揸大手貨的股東就傷腦筋一點，唔跟供就被攤薄權益。
之前新地三兄弟講掂數分家，大佬炳湘攞股票退出新地董事局，如今新地以發輪方式供股，似乎係炳江、炳聯想透過供股集中股權，但係大佬炳湘透過發言人聲言會供股，咁三兄弟鬥法的局面又會持續，對公司都唔係咁有利啦。
盧永雄
魔童王維基真係有橋，最新一招仲係同亞視王征哥傾租用亞視頻道，魔童轉數真係快到得人驚。
當日《巴士的報》爆料話王維基和王征密會傾買起亞視，但由於價錢差太遠，最後不歡而散。一般人有此經驗，以後都唔諗再接觸。點知王維基一個轉身，過完年又搵人向王征的伙計傳話，話想租亞視一至兩條數碼頻道，本來和王維基反咗目的王征，又竟然OK喎，雙方就密斟每條頻道一年1000萬的價錢，去租亞記的頻道。不過王征將呢個建議提上亞記高層會議後，竟然被自己伙計執行董事雷競斌(吔叔)反對，結果就搞出一鑊王征怒炒吔叔。
市場傳傳吓，傳到王維基唔止向王征租亞視頻道，仲傾好將成個亞視買埋。呢個世界乜事都會發生，特別係王征有少少神化，所以乜嘢可能性都不能排除，但牌面睇雙方不易就亞視賣盤達成協議。
不妨分析吓王維基和王征共舞的三個可能性，從王維基角度睇，可分上中下三策。第一是上策，係好平價錢買到亞視。大家留意吓亞視出的通告，特別提到王征家族累計投資在亞視有18.2億，都好少見到啲通告提醒人自己喺呢間公司輸咗幾多錢，王征咁創新，都不外乎想提醒潛在投資者，我投咗咁多錢，唔好旨意我平賣。上次雙王會，王征開價10幾億，雖然只是開價，但估佢最少都要收到10億才願意離場，但王維基只還價5、6億，雙方差距好大。如果王維基用5億買到，若然唔想自己出晒錢，只佔51%，搵到人投資另外的49%，他自己用2.55億就攞到亞視個牌，呢個當然係上策。問題係王征肯唔肯平賣?
第二是中策，租亞記頻道播港視節目。王維基租一兩條亞記頻道，將港視的好節目全數放在這些亞記頻道播出，搶佔市場。王維基放入亞記的頻道，就如放入特洛伊城的木馬，內藏希臘精兵，有需要時就殺出來奪城。觀眾睇慣睇熟亞視頻道播放的港視節目時，到明年若政府不讓亞視續牌，港視就順理成章成為獲取新牌的大熱門; 反過來政府若想讓亞記續牌，若亞記自己製作的節目收視當時仍然是1點、2點，但港視在亞記頻道播放的節目有10幾、20點收視，咁為何讓亞記續牌而不將牌照轉發給港視呢? 所以王維基一年俾亞記2000萬租兩條頻道，兩年才4000萬，都不要講宣傳效果，只係當打兩口棺材釘，都值番呢個銀碼。
第三是下策，貴買亞視。若王維基用9至10億的高價買亞視，即使只佔一半股權，都要用4億幾5億。王維基和人閒聊時提過，不想貴買亞視，係怕明年到期亞視不獲續牌。但知情者話，若王維基買了亞視，佢自信挾港視的聲勢，可以逼到政府續牌，但港視而家手頭現金30億，未來要和無線打硬仗，估計要燒好多錢，所以用10億(或找伙伴合作用5億)去買個亞視牌，耗費金錢太多，留作未來打仗的錢太少，不化算。
講來講去，除非王征願意賤賣亞記，否則王維基租一兩條頻道，放隻木馬入去玩，條數易計好多啦。
盧永雄
