博客文章
第四十六屆香港國際電影節圓滿閉幕，今年除咗打頭陣嘅開幕電影《明日戰記》同《風再起時》令人驚喜，由翁子光監製，何爵天執導嘅《正義迴廊》一樣有睇頭，而演員麥沛東更憑電影奪得新秀電影競賽華語部分最佳男演員獎，一鳴驚人。
由高先電影發行嘅《正義迴廊》，故事以2013年轟動全港嘅大角嘴雙屍案為藍本，楊偉倫飾演謀殺雙親嘅主謀，麥沛東就飾演幫手肢解嘅幫兇。
呢單案霸戲哥記憶特別深，除咗因為案件嘅凶殘（請自行google），傳媒嘅處理手法、高登神探嘅介入、以至兇手嘅背景（某財經版記者）都有話題性，唔怪得拎嚟做電影題材。
不過導演何爵天將焦點放喺法庭戰上，究竟乜嘢係真正嘅正義，辯護律師竭力為當事人脫罪又算唔算？事實真相擺在眼前，但控辯雙方千方百計說服陪審團，呢樣又係唔係公義？淨係呢點，霸戲哥已經好想入場睇。
《正義迴廊》嚟緊會喺高先電影院放映優先場，可惜已經滿座啦。睇嚟霸戲哥都要等上正場先有得睇。
霸戲哥
** 博客文章文責自負,不代表本公司立場 **
霸戲哥都識少少韓文，都知道「噩媽」係阿媽咁解。呢套啱啱喺N記上架嘅戲，戲名的確改得有計，將噩夢同阿媽兩種元素食晒，只可惜套戲本身麻麻，作為一齣劇情恐怖片，要恐怖唔恐怖，要劇情冇劇情，失敗。就算有金球獎視后吳珊卓主演，都唔太救得番套戲。
故事講吳珊卓飾演嘅Amanda同女兒Chrissy住喺美國偏遠地方，靠養蜂過活。某日，一位聲稱係Amanda舅父嘅神秘人，帶住Amanda老媽嘅骨灰過嚟，被迫正視塵封咗嘅恐懼。原來Amanda細個畀老媽虐待，對電器產生恐懼，
所以先與世隔絕。
套戲出現嘅鬼怪，某程度上都係Amanda投射出嚟嘅心魔，因為童年畀老媽虐待，堅拒步對方後塵，處處着緊個女，結果過度嘅約束，反而令Amanda慢慢變成「噩媽」。
套戲其實想探討韓國人移民美國尋夢所留下嘅問題。Amanda老母當年就係因為嚟到美國「水土不服」，畀老公拋棄，先至對Amanda施虐。潛台詞係，移民美國，對某啲人嚟講，先至係真正嘅噩夢。
成齣戲想表達嘅嘢都非常之片面，故事亦冇大驚喜，最慘係導演為咗營造恐怖氣氛，大部份畫面都黑麻麻，根本都睇唔清楚演員做緊乜。
還好片長只係93分鐘，真係瞓唔着時睇睇也無妨。
