霸戲哥之日常#392｜ 噩媽

霸戲哥都識少少韓文，都知道「噩媽」係阿媽咁解。呢套啱啱喺N記上架嘅戲，戲名的確改得有計，將噩夢同阿媽兩種元素食晒，只可惜套戲本身麻麻，作為一齣劇情恐怖片，要恐怖唔恐怖，要劇情冇劇情，失敗。就算有金球獎視后吳珊卓主演，都唔太救得番套戲。

故事講吳珊卓飾演嘅Amanda同女兒Chrissy住喺美國偏遠地方，靠養蜂過活。某日，一位聲稱係Amanda舅父嘅神秘人，帶住Amanda老媽嘅骨灰過嚟，被迫正視塵封咗嘅恐懼。原來Amanda細個畀老媽虐待，對電器產生恐懼，
所以先與世隔絕。

套戲出現嘅鬼怪，某程度上都係Amanda投射出嚟嘅心魔，因為童年畀老媽虐待，堅拒步對方後塵，處處着緊個女，結果過度嘅約束，反而令Amanda慢慢變成「噩媽」。

套戲其實想探討韓國人移民美國尋夢所留下嘅問題。Amanda老母當年就係因為嚟到美國「水土不服」，畀老公拋棄，先至對Amanda施虐。潛台詞係，移民美國，對某啲人嚟講，先至係真正嘅噩夢。

成齣戲想表達嘅嘢都非常之片面，故事亦冇大驚喜，最慘係導演為咗營造恐怖氣氛，大部份畫面都黑麻麻，根本都睇唔清楚演員做緊乜。

還好片長只係93分鐘，真係瞓唔着時睇睇也無妨。

霸戲哥

** 博客文章文責自負,不代表本公司立場 **

認真問，依家係咪唔再叫第六波疫情？確診數字就快破萬，病毒更入侵娛樂圈，繼TVB總經理曾志偉上周確診，近日再傳出有五名候選港姐中招，令原定周日舉行嘅《2022香港小姐競選》準決賽都被迫取消。由於決賽鐵定喺9月25日喺紅館舉行，當晚惟有將準決賽同決賽二合為一，都算係迫不得已嘅安排。

冇咗準決賽，換句話講，就係19位候選佳麗直入決賽，對於冇咁標青嘅佳麗，都未免唔係好事噃。至於五位中招港姐，呢段時間都唔會再安排宣傳同綵排，等佢哋可以靜心休養，亦保障同其他佳麗同工作人員安全。如果咁唔好彩，到決賽當日仍然未好番，就惟有退選，亦會成為史上首位因患新冠肺炎而被迫退選嘅港姐嘞。

今個星期冇港姐睇，TVB就安排特備節目補上，就係播出由蘭茜做「一集獎老」嘅《開心無敵獎門人》，帶領嘉賓梁靖琪、文頌嫻、湯盈盈、周家蔚、鍾麗淇、方力申、吳家樂、黃建東、鄭俊弘及何遠東玩遊戲，陪觀眾笑餐飽。