霸戲哥之日常#400｜ 財務自由

好多人以為霸戲腳日日躺平煲劇睇戲睇埋歐聯，梗係家底豐厚，印印腳唔使憂柴憂米。實情係，霸戲哥做到隻屐先掹掹緊，你要知道大爺雞三餐同零食都唔惹少，都未計每月進貢馬會條數。

財務自由，即係「上岸」啦，係霸戲哥朋友圈成日討論嘅課題。但討論還討論，點實踐先係最大問題。

師奶經濟學極其量教你精打細算，去超市格價儲積分拎印花，慳埋慳埋都唔夠你輸通脹。生活經濟學並唔係咁，而係一門好高深嘅學問。

Netflix最近有套紀錄片《聰明生活經濟學》上架，請來理財大師為幾位clients提供一整年財務諮詢，分享唔少實用建議，助你提早邁向財務自由嘅目標——乜都唔使做都有錢收。

大前題係，你要覺得啃食社會資源係冇問題。如果你有少少罪惡感，建議你都係好似霸戲哥咁，至少捱到六十歲先諗休息嘞。

霸戲哥

** 博客文章文責自負,不代表本公司立場 **

早幾日翻睇《盜墓迷城》，豬視妹先問起靚仔男主角Brendan Fraser去咗邊。記憶中，佢之前拍完《盜墓迷城》之後，又真係冇乜佳作。後來經歷婚變同母親離逝，情緒陷入低谷，再加上18年自爆曾被荷李活外國記者協會前主席Philip Berk性騷擾，自此被列入黑名單，一沉百踩，星途近乎玩完。

不過你又點會估到，Brendan喺今屆威尼斯電影節載譽歸來，佢演出由Darren Aronofsky執導嘅《The Whale》日前舉行首映，完場後觀眾起立鼓掌達7分鐘。Brendan喺戲入面飾演600磅大肥佬，故事講述佢位同性戀人離世後難掩哀痛，開始暴飲暴食，人生陷入低潮。佢一邊要同17歲女兒修補關係，一邊同急轉直下嘅健康搏鬥。戲裏戲外嘅遭遇都有啲相似。

Brendan為咗演活角色，都有刻意增肥，睇相就算冇600磅咁誇，300磅點都走唔甩。冇咗昔日嘅俊肖外表，反而換嚟更多掌聲，所以話人生好似一場足球賽，只要唔放棄，下半場隨時可以扭轉劣勢。

即管睇吓Brendan會唔會拎埋威尼斯影帝。