霸戲哥之日常#399｜ 巨鯨翻生

早幾日翻睇《盜墓迷城》，豬視妹先問起靚仔男主角Brendan Fraser去咗邊。記憶中，佢之前拍完《盜墓迷城》之後，又真係冇乜佳作。後來經歷婚變同母親離逝，情緒陷入低谷，再加上18年自爆曾被荷李活外國記者協會前主席Philip Berk性騷擾，自此被列入黑名單，一沉百踩，星途近乎玩完。

不過你又點會估到，Brendan喺今屆威尼斯電影節載譽歸來，佢演出由Darren Aronofsky執導嘅《The Whale》日前舉行首映，完場後觀眾起立鼓掌達7分鐘。Brendan喺戲入面飾演600磅大肥佬，故事講述佢位同性戀人離世後難掩哀痛，開始暴飲暴食，人生陷入低潮。佢一邊要同17歲女兒修補關係，一邊同急轉直下嘅健康搏鬥。戲裏戲外嘅遭遇都有啲相似。

Brendan為咗演活角色，都有刻意增肥，睇相就算冇600磅咁誇，300磅點都走唔甩。冇咗昔日嘅俊肖外表，反而換嚟更多掌聲，所以話人生好似一場足球賽，只要唔放棄，下半場隨時可以扭轉劣勢。

即管睇吓Brendan會唔會拎埋威尼斯影帝。

霸戲哥

** 博客文章文責自負,不代表本公司立場 **

早排港人受「賣豬仔」事件影響，一聽見東南亞國家就起晒雞皮，搞到連泰國菜館啲生意額都大減，霸戲哥心諗使唔使咁誇張呀，食餐泰國菜唔通又呃你過去打工咩。J2都要臨時變陣，原本之前播出嘅《沖遊泰國7》要被迫押後，到噚晚終於首播。

胡慧沖主持嘅《沖游泰國》拍咗咁多齣，梗係有班忠實支持者啦，但霸戲哥其實之前一輯都未睇過，可能本身對泰國印象麻麻啦。今輯多咗港泰混血兒「叉燒姐」鄺玲玲拍住胡慧沖主持，見到討論區都有人留言讚索。霸戲哥反而欣賞佢因為識泰文，間唔中喺節目度教吓大家，第日唔小心爆粗，你都可以話係講緊泰文。

噚晚嗰集帶觀眾去芭提雅，其中參觀一個糖果天地，用航拍top shot影落去，啲糖果五顏六色係真係有啲似candy crush嘅，但近睇就觀感爭咁啲，望落有啲似水晶膠加雙氧水整出嚟。

泰國始終靠旅遊業食糊，無論係餐廳、食肆定主題公園，都依賴「打卡位」去吸引遊客，變相令核心價值嘢可能忽視，譬如食品味道咁啦。

豬視妹成日話想再嚟泰國，霸戲哥唔驚「賣豬仔」，反而係最怕餓死異鄉。