霸戲哥之日常#398｜ J2監察站(30)：泰國雜談

早排港人受「賣豬仔」事件影響，一聽見東南亞國家就起晒雞皮，搞到連泰國菜館啲生意額都大減，霸戲哥心諗使唔使咁誇張呀，食餐泰國菜唔通又呃你過去打工咩。J2都要臨時變陣，原本之前播出嘅《沖遊泰國7》要被迫押後，到噚晚終於首播。

胡慧沖主持嘅《沖游泰國》拍咗咁多齣，梗係有班忠實支持者啦，但霸戲哥其實之前一輯都未睇過，可能本身對泰國印象麻麻啦。今輯多咗港泰混血兒「叉燒姐」鄺玲玲拍住胡慧沖主持，見到討論區都有人留言讚索。霸戲哥反而欣賞佢因為識泰文，間唔中喺節目度教吓大家，第日唔小心爆粗，你都可以話係講緊泰文。

噚晚嗰集帶觀眾去芭提雅，其中參觀一個糖果天地，用航拍top shot影落去，啲糖果五顏六色係真係有啲似candy crush嘅，但近睇就觀感爭咁啲，望落有啲似水晶膠加雙氧水整出嚟。

泰國始終靠旅遊業食糊，無論係餐廳、食肆定主題公園，都依賴「打卡位」去吸引遊客，變相令核心價值嘢可能忽視，譬如食品味道咁啦。

豬視妹成日話想再嚟泰國，霸戲哥唔驚「賣豬仔」，反而係最怕餓死異鄉。

霸戲哥

** 博客文章文責自負,不代表本公司立場 **

最近一連發生唔少轟動嘅倫常慘案，引起大眾嘅關注。不過以香港人嘅金魚記憶，隔番一頭半個月就統統唔記得晒。一時間咁多大單案，霸戲哥深信唔係出於偶然，當然唔可以就咁斷定香港危險咗，但社會氛圍、經濟環境、再加上無止境嘅疫情，都會迫到令人情緒爆發，做出不可挽回嘅憾事。

無綫今晚播出新劇《黯夜守護者》，由「亞視同學會」陳展鵬、陳煒同袁文傑孭飛，表面上係一般嘅都市犯罪劇，實情係借案件探討社會深層次問題，揭開人性陰暗面，呢類劇種比較少有，唔知師奶啱唔啱睇呢。

霸戲哥睇完第一集，暫時感覺唔錯，難得係唔再用光燦燦嘅世界燈，色tone亦偏向暗，拍得出都市嘅冷漠同無力感。第一集結尾更加出人意表，至少成功吸引到霸戲哥追看落去。

相信《黯夜守護者》編導野心唔細，至少唔係只睇收視，而係希望觀眾能夠喺劇入面有所反思，拎到嘢走，唔係睇完就算。