霸戲哥之日常#403｜ 大象走得快

大象走得快，一定有古怪。

2020年，一群大象突然離開西雙版納自然保護區，向北進發。野生象有規律地向前遊蕩，甚至闖入民居，大模斯樣地喝水，連鹽巴都毫不客氣地捲進口裏。

今晚《無窮之路 II—無價之保》，陳貝兒帶觀眾去到西雙版納，採訪幾位守護大象嘅幕後英雄，包括自然保護區工程師、亞洲象救護與繁育中心獸醫、亞洲象救護與繁育中心飼養員等等，嘗試了解大象遷徙嘅原因。

曾經係瀕臨絕種嘅亞洲象，八十年代只得大約100隻。經歷過多年嘅保育，亞洲象數量攀升到近300隻，反而導致食物唔夠分，所以要搬竇找尋更多「機遇」。

要引領呢班頑皮大象返番去保護區，原來一啲都唔簡單。今集節目就見到呢班無名英雄嘅英勇事蹟，中間過程有笑有淚。

霸戲哥

** 博客文章文責自負,不代表本公司立場 **

今個星期除咗《飯戲攻心》，其實仲有一套戲好值得留意，就係印度版《阿甘正傳》嘅《打死不離喇星夢》。

戲名叫得「打死不離」，你就意識到又有印度劉華Aamir Khan主演，佢就係扮演印度版阿甘「Laal Singh Chaddha」。奇就奇在班道德L同平機會啲人去晒邊，「喇星」咁俗都過到骨？

電影係翻拍1994年經典，同阿甘故事如出一轍，只係加入咗啲印度元素，多咗浸咖哩味。故事講喇星天生自閉同殘疾，但依然咬緊牙關，跑出人生夢，仲追到埋女神，勵志到呢。

至於大家最期待嘅畫面，好似「Run Forest Run」，同埋金句「Life is like a box of chocolates」梗係喺度，只係前者改做「Run 喇星 Run」，後者就變成「Life is just like a golgappa」而已。Golgappa（酥炸球）係印度著名嘅街頭小吃，由小麥粉製成，中間塞入馬鈴薯泥同埋綠色狀嘅香料混合物，味道都好複雜吓。

唔講唔覺《阿甘正傳》都拍咗接近30年，未睇過嘅可以當新片睇，睇過嘅亦可以當欣賞印度劉華嘅演繹，青春回憶全部返晒嚟。