林鄭也熱身?

中央港澳工作協調小組組長張德江本月來港， 外界瘋傳是中央對特首人物拍板前的最後考察。 中大校長沈祖堯都話可以提早唔撈校長個位，兼自爆無心參政，被視為報名做特首候選人。在這種形勢下， 政務司司長林鄭月娥接受商台訪問，相當令人期待。

林鄭當然不會改口話「我來選特首」，但訪問中也有微言大義，重點包括「艱苦的童年」：佢話細個住唐樓冇電梯，廁所無水沖廁，更加唔會扭開水喉有熱水，所以今時今日最令佢快樂嘅事，就係返到屋企可以沖個熱水涼。

另一重點係「憑實力出頭」：林鄭在五兄弟姊妹中， 係第一個入到大學，由細到大都考第一，試過小學一次期中考得第四，佢已經喊爆收場。本來覺得叻人要讀理科，想考入港大做醫生，後來會考理科成績麻麻，反而歷史、英國文學考得好，所以到預科就轉讀文科，做唔成醫生變咗「好打得」的高官。

另一重點是「人生有理想」。千祈唔好以為林鄭做AO望高薪厚職，佢自爆大學生時代有兩大「污點」：佢在大學年代活躍於社運，組織香港大學學生去北京清華大學交流，佢係副團長，民主黨李永達同單仲偕都係佢團員。考AO前半年，仲在政府總部外靜坐，幸而無影響入政府。在官場打滾36年，佢話最有成就感的是做社署署長一職； 佢明言加入政府時對社會問題感到不安及不滿， 但選擇入政府在建制內改變。被問及做唔做到呢？答謂：「 如果我唔覺得做到，我唔會留到今日。」

政壇八卦友話，雖然林鄭無講乜嘢硬嘢，但內容直情等如參選時的軟銷手段，包括出身寒微、堅持理想、 奮鬥上位。所以大家唔好睇少林鄭呢隻話唔參選的「黑馬」。

Ariel

** 博客文章文責自負,不代表本公司立場 **

本土民主前線發言人梁天琦與支聯會義工鄒幸彤，於周四在印度達蘭薩拉大昭寺，與達賴喇嘛閉門會面兩小時。

　　

自由亞洲電台（RFA）報道稱，來自內地、香港、澳門、 台灣及歐美等60人，出席第11屆美國公民力量及藏人組織合辦的 「族群青年領袖研習營」，由美國公民力量創辦人、 曾參與六四事件的民運人士楊建利帶隊。

自由亞洲電台訪問梁天琦，香港人好少見達賴喇嘛，有無諗過？梁天琦答話:「邊有諗過呀! 達賴喇嘛喎、精神領袖喎！邊度有可能會見呀平時」。 記者再追問成個感覺點呢? 「成個感覺好唔錯，與會者包括來自歐盟和印度的議員， 對方於席間分享所屬國家及對中國的看法， 今次係第一身知道人哋點樣睇，而唔係以往咁樣，淨係喺網站、 報紙睇到佢哋發表嘅嘢。」

自由亞洲電台報道，達賴於會面期間談笑風生， 言談豁達及幽默不改，氣氛輕鬆。達賴喇嘛亦為香港祈福， 冀港人不要放棄，要堅毅與熱情並重。

政壇中人評論，梁天琦見達賴後的評論如睇明星那樣，但達賴不是明星，是西藏流亡領袖，亦是中國眼中藏獨的頭頭。過去泛民也不會去掂藏獨問題不會公然去見達賴，本土民主前線不止搞港獨，還去掂藏獨，本民前幕後頭頭是有意踩入雷區，挑戰北京的底線。