撰文：柳炳 @ 香港兔蘆術數學會
學八字時，經常會在書中見到一句說話：「反吟伏吟淚淋淋」，一聽已經嚇一跳！反吟和伏吟其實是指兩種干支的狀態，他們的出現往往代表命主運程不順甚至有面臨災難的可能，尤其當干支的十神或五行為忌的時候情況更壞。
所謂伏吟是指大運或流年與命局的干支相同。例如丙申日出生的人，到今年丙申年就是伏吟日柱，該日生人今年就需小心婚姻易出問題。而反吟又有另一個名字，叫 天尅地沖，是指大運或流年與原局的天干相尅，同時該柱的地支相沖。例如庚寅年出生的人在今年便年柱反吟。該年出生的人需當心長輩健康及田宅的問題。
至於伏吟和反吟所反映的事情則取決於他們所在的宮位：
年柱 - 田宅或祖輩有災！
月柱 - 父母或家人有災！
日柱 - 婚姻或伴侶有災！
時柱 - 子女或事業有災！
老一輩的人都喜歡在六十歲時擺大壽，其實都同反吟伏吟有關。是關每個人到六十歲時所行的大運都會出現反吟的情況，我們稱為沖提大運！固此老人家為擔心家宅出問題，都會大事慶祝一番，希望能沖喜擋災。
#玄學 #八字 #術數 #面掌相 #香港兔蘆術數學會
(相片來源：互聯網)
香港兔蘆術數學會
** 博客文章文責自負,不代表本公司立場 **
撰文：朱雀神君 @ 香港兔蘆術數學會
踏入第四個年頭，繼續判卦！
回想當初學習之時，每逢上堂前後定必温習温習！
乾、兑、離、震、巽、坎、艮、坤
每日都定會背一背
青龍、朱雀、勾陳、螣蛇、白虎、玄武
更係日日都會對住既朋友仔！
先天八卦、後天八卦，等等都要認識！
更要參考河圖、洛書！
由梅花易數起，一直到文王卦，不停的練習！
自占自解，慢慢學習！
占朋友健康、感情、事業，每樣都占一占！
直到有一日，終於遇上左真係唔占唔得既事........
話說，當時有一親友病重，昏迷狀態，一直不醒！
見到面，並不好受。
平時成日俾人話，講又唔聽，叫極無反應，行又唔行！
呢個時候我真係好想佢咁樣話我，但係而家昏迷左，我已經再聽唔到佢把聲。
如是者，我就起卦占親人健康狀況.........
得出黎結果，如果過得到第二日(丑日)下午5時(申時尾)，就可以安全。
接落黎，我就已經起到諗緊好唔好同屋企人講.......
唔講，可能大家當刻會好受 d
講，就等大家有心理準備，第二日可以齊齊整整送別親人
人生的決擇，就全在此一刻！
最後，我選擇講出黎！
個一份勇氣，唔係人人有，站在習術數者立場，更加唔可以提「死」一字！
但我占得出此卦，我就要負最大責任，我要令各人知道有此危險！
到了，第二日早上11時，醫院急電，親人病危，要做好心理準備！
我當時心諗：「發克！唔係真係ar ma ！」
屋企人當日忙到不得了，大家好緊張、好擔心，而我就不停諗「一定要過5點！」x好多次！
去到最後，親人在 4時55分去世。
我那刻心情跌至歷史低位，我不停鬧自己點解要識占卦！點解要占呢支卦？唔占咪無事！
從此，我就停止左占卦。
過後，親友講到呢件事，大家都好感激我講出黎！如果唔係都唔會咁齊整見最後一面，預算定請假！
雖然我心好受左，得到安慰，但我依然放棄文王卦！甚至係討厭！
過左半年，朋友有急事相求，想問卦。起初我推得就推，又話自己唔準，揾我師傅 la............
但佢講左一句：「我最相信你，你幫下我 la，我揾唔到人好似你講得咁好，幫下我 la........（下刪數萬字）」
就係佢，令我再次回占卦路上！
直到今天，我放膽左去解卦，聽既人更覺準確，並無不同意！
近日在公司同事們都急急發掘小弟才能，我本着解決困難為己任，盡力協助！
助人為快樂之本，令到問事者安心！
習文王卦不難，最難係遇上最差既事點樣開口講！
可能老天爺早知道我會遇上此事，所以就安排左一次難忘既回憶俾我！
今後，各位學卦既朋友 或 問事既朋友，你要有既係勇氣！有勇氣面對卦既悲事，將會令個人成長！
PS: 放下過去，面對將來！珍惜同親人既相處時光！
PS2: 如有朋友想問事，你亦夠膽黎問，本君在此等候！但我有規矩，凡問事者事後請作出捐獻！
#玄學 #八字 #術數 #面掌相 #香港兔蘆術數學會
(相片來源：互聯網)
學會網站：https://www.facebook.com/numerology.rabbit/
學會介紹：https://www.facebook.com/numerology.rabbit/info/?tab=page_info
