博客文章
上個禮拜寫完《沖遊泰國》，估唔到反應係出奇咁好，霸戲哥諗到嘅可能性有三個：胡慧沖好受歡迎；香港人困得太耐；叉燒姐鄺玲玲張相見得吓人。
想知究竟係邊個原因，好簡單啫，做個control experiment就得啦。今晚呢集冇叉燒姐，取而代之係「冬蔭妹妹」Wanmai Chotika，佢主要負責喺鏡頭前行行企企搞gag過場，聽晚開始仲會以泳裝亮相添。
有時真係幾佩服胡慧沖，能夠將看似平平無奇嘅景點，講到「非去不可」咁，今集介紹清邁，感覺上比曼谷荒蕪好多，所謂嘅「景點」驟眼睇真係冇乜特別，但胡慧沖用佢嘅說話節奏同幽默感，依然介紹得頭頭是道，的確有料。
睇多幾集，話唔定真係可以消除到霸戲哥對泰國嘅偏見。
霸戲哥
** 博客文章文責自負,不代表本公司立場 **
Disney+好似靜咗一輪，近日終於有大作上架，就係Tom Hanks主演嘅《木偶奇遇記》真人版電影。
呢套家喻戶曉嘅童話，動畫版實在太深入民心，迪士尼梗係唔會就咁照辦煮碗再拍一次，所以都作出咗唔少改動。至於改得好唔好，就真係好見仁見智。
我哋認知嘅Pinocchio，當然係講大話鼻子會伸長嘅版本，細蚊仔睇完真係有童年陰影，唔敢乜都隨口噏。不過呢個已經係迪士尼嘅「淨化」版本，抹去原作者Carlo Lorenzini（筆名Carlo Collodi）嘅原本意義。
原版《木偶奇遇記》其實係關於個人解放，作品黑暗且富有政治批判色彩。作者借Pinocchio呢個角色，去警惕當代嘅意大利人，唔接受教育就會好似木偶咁容易被人操控，又或者淪為政治嘅傀儡，做「人」不成，鬼唔似鬼。簡單講，就係「細個唔讀書，大個做運輸」。
呢個上上世紀嘅童話故事，佢嘅寓意到今日依然適用。只不過，Carlo Lorenzini應該都估唔到，今日有人就算飽讀詩書，都心甘命抵選擇做扯線公仔啫。
