霸戲哥之日常#407｜ Pinocchio

Disney+好似靜咗一輪，近日終於有大作上架，就係Tom Hanks主演嘅《木偶奇遇記》真人版電影。

呢套家喻戶曉嘅童話，動畫版實在太深入民心，迪士尼梗係唔會就咁照辦煮碗再拍一次，所以都作出咗唔少改動。至於改得好唔好，就真係好見仁見智。

我哋認知嘅Pinocchio，當然係講大話鼻子會伸長嘅版本，細蚊仔睇完真係有童年陰影，唔敢乜都隨口噏。不過呢個已經係迪士尼嘅「淨化」版本，抹去原作者Carlo Lorenzini（筆名Carlo Collodi）嘅原本意義。

原版《木偶奇遇記》其實係關於個人解放，作品黑暗且富有政治批判色彩。作者借Pinocchio呢個角色，去警惕當代嘅意大利人，唔接受教育就會好似木偶咁容易被人操控，又或者淪為政治嘅傀儡，做「人」不成，鬼唔似鬼。簡單講，就係「細個唔讀書，大個做運輸」。

呢個上上世紀嘅童話故事，佢嘅寓意到今日依然適用。只不過，Carlo Lorenzini應該都估唔到，今日有人就算飽讀詩書，都心甘命抵選擇做扯線公仔啫。

霸戲哥

** 博客文章文責自負,不代表本公司立場 **

今年係羅文逝世20年，嚟緊喺紅館會舉行演唱會，紀念呢位一代歌星。而今晚10點，無綫翡翠台有特備節目《我們都有一首羅文的歌》播出。

多得首《獅子山下》，呢00後都認識呢位傳奇歌手。再後生嗰批，或者真係未聽過羅文都未定。問豬視妹心裏面有邊首羅文的歌，佢都要諗一大輪，然後懶嬌悄咁唱咗兩句「波斯貓～身軀嬌悄」。至於霸戲哥呢，嘿嘿，一定係《激光中》，讀書時已經成日唱，在那激光中穿梭，我用乒乓波……

羅文嘅歌聲係比較另類。跟霸戲哥同輩，唔係哥哥就阿倫，一係就四大天王，好少會話自己鍾意聽羅文。但神奇在於，羅文嘅歌係植根喺我哋舊代人嘅腦海，幾乎首首都唱到幾嘴，好似《小李飛刀》、《前程錦鏽》、《幾許風雨》咁，只要身邊有人哼一句，你自自然然會跟住唱，好神奇。

羅文本身造型妖艷，但唱出嚟嘅歌又正氣無比，或者呢種反差先至令人着迷。

相信今日都幾難再有呢類型歌手。