博客文章
今年係羅文逝世20年，嚟緊喺紅館會舉行演唱會，紀念呢位一代歌星。而今晚10點，無綫翡翠台有特備節目《我們都有一首羅文的歌》播出。
多得首《獅子山下》，呢00後都認識呢位傳奇歌手。再後生嗰批，或者真係未聽過羅文都未定。問豬視妹心裏面有邊首羅文的歌，佢都要諗一大輪，然後懶嬌悄咁唱咗兩句「波斯貓～身軀嬌悄」。至於霸戲哥呢，嘿嘿，一定係《激光中》，讀書時已經成日唱，在那激光中穿梭，我用乒乓波……
羅文嘅歌聲係比較另類。跟霸戲哥同輩，唔係哥哥就阿倫，一係就四大天王，好少會話自己鍾意聽羅文。但神奇在於，羅文嘅歌係植根喺我哋舊代人嘅腦海，幾乎首首都唱到幾嘴，好似《小李飛刀》、《前程錦鏽》、《幾許風雨》咁，只要身邊有人哼一句，你自自然然會跟住唱，好神奇。
羅文本身造型妖艷，但唱出嚟嘅歌又正氣無比，或者呢種反差先至令人着迷。
相信今日都幾難再有呢類型歌手。
霸戲哥
** 博客文章文責自負,不代表本公司立場 **
邊個話中秋節一定要食月餅？食薄餅又得唔得先？點解，事關豬視妹噚晚睇咗集Netflix嘅紀錄片《主廚的餐桌：披薩》，心思思想叫番個薄餅嚟食食。
《主廚的餐桌》十足鬼佬版《滿足的味道》，喺N記已有一定名氣，而呢個series共六集，題材當然係圍繞Pizza，但探討主廚嘅成功人生，其實先係主菜。
講到Pizza，人人都話自己係Pizza之王，但邊度先最堅？Pizza來自意大利拿坡里（另一說法係來自中國，詳見電影《摩登如來神掌》），屬低下階層食物，意大利人對Pizza極之講究，絕對唔容許加入菠蘿做配料，寧願餓死唔食。
講究還講究，好食還好食，睇完節目，有說全球最好食嘅Pizza，可能係亞利桑那州鳳凰城嘅Pizzeria Bianco。創辦人Chris Bianco知道要做好食嘅Pizza，只得一個秘訣，唔係水質、唔係烹調溫度、唔係煮法，而係食材嘅質素。佢做pizza嘅用料，由蕃茄、芝士、香料以至麵粉，都由Chris親自挑選，基乎每個pizza都由佢嚟主理。亦因為咁，Pizzeria Bianco開業冇耐已打響名堂，每日慕名前來品嚐嘅食客大排長龍，而Chris亦間接推動當地嘅Pizza文化，Pizza之王當之無愧。
香港都有好食嘅Pizza店，銅鑼灣就有一間，可惜屋企附近都係嗰啲連鎖店，冇計，頂住肚先啦。
