博客文章
霸戲哥認為人類最難克服嘅恐懼，應該係畏高。呢種與生俱來嘅本能反應，令人意識到高處墮下嘅危險，唔夠膽喺高空做出高難度動作。
要摵甩呢種本能反應，自然要接受高強度同密集式嘅特訓，譬如，的你上IFC天台獨處。
最近有齣幾另類嘅戲上映叫《命懸2000呎》，主要場景只有一個，就係離地2000呎嘅電視塔。故事非常簡單，女主角Becky親眼睇住老公攀石跌死，成年都活喺陰影，好姊妹Hunter決定邀請佢挑戰攀爬電視塔，實行行邊度跌底邊度爬起身。睇戲唔好駁戲，兩個爬到塔頂時出現意外是常識吧，成齣戲就係睇佢兩個半天吊，鏡頭pan番落地下都腳仔軟。
唔知不停睇呢套戲，又可唔可以克復到畏高呢？
霸戲哥
** 博客文章文責自負,不代表本公司立場 **
霸戲哥知道有隻電腦game叫《Cyberpunk 2077》，推出嗰陣係威係勢，點知後來啲bug多到玩唔落手，好多骨灰級PC戰友玩咗陣就棄game。
雖則隻game劣評如潮，但居然衍生到動畫影集《Cyberpunk: Edgerunners》，由遊戲開發商 CD Projekt Red 與日本動畫工作室 Studio Trigger 共同製作，日前正上喺Netflix上架。
故事背景設喺一個被末世氛圍籠罩嘅城市，講述街頭小子David被學校開除、母親離世，一夜間失去了一切，Nothing to lose嘅佢決定植入非法人體裝置，靠做非法勾擋喺黑暗之城掙扎求存。
動畫保留咗唔少隻game嘅元素，加上不停嘅場景轉換、快速嘅節奏同炸耳嘅BGM，令人更加投入劇情，霸戲哥唔覺唔覺一口氣睇咗三集。
N記近排咁多動畫，呢套《Cyberpunk: Edgerunners》係值得一睇。
