博客文章
霸戲哥知道有隻電腦game叫《Cyberpunk 2077》，推出嗰陣係威係勢，點知後來啲bug多到玩唔落手，好多骨灰級PC戰友玩咗陣就棄game。
雖則隻game劣評如潮，但居然衍生到動畫影集《Cyberpunk: Edgerunners》，由遊戲開發商 CD Projekt Red 與日本動畫工作室 Studio Trigger 共同製作，日前正上喺Netflix上架。
故事背景設喺一個被末世氛圍籠罩嘅城市，講述街頭小子David被學校開除、母親離世，一夜間失去了一切，Nothing to lose嘅佢決定植入非法人體裝置，靠做非法勾擋喺黑暗之城掙扎求存。
動畫保留咗唔少隻game嘅元素，加上不停嘅場景轉換、快速嘅節奏同炸耳嘅BGM，令人更加投入劇情，霸戲哥唔覺唔覺一口氣睇咗三集。
N記近排咁多動畫，呢套《Cyberpunk: Edgerunners》係值得一睇。
霸戲哥
** 博客文章文責自負,不代表本公司立場 **
噚日突然收到BBC push，法國電影大師尚盧高達離世，享年91歲。
世事往往就係咁橋，晏晝扭開電視，重播緊《阿飛正傳》，張國榮發表佢套無腳雀仔論，而呢句金句並唔係王家衛度嘅，而係出自佢偶像尚盧高達套《不法之徒》。
霸戲哥認識呢位法國電影新浪潮嘅靈魂人物，全因為以前工作嘅戲癡上司，當年成日推薦我睇《不法之徒》同《斷了氣》，當然上面提到「無腳雀仔」嘅小趣事，亦係佢分享嘅。
同戲癡上司共事多年，佢擴闊咗我對電影嘅睇法。後來因工作關係，開始接觸更多法國電影新浪潮作品，好似杜魯福嘅《四百擊》、積葵丹美嘅《秋色伊人》、伊力盧馬嘅《慕德的一夜》咁，仲寫過篇專題講法國電影新浪潮添。
尚盧高達創意無限，鍾意顛覆傳統，所以佢嘅作品都會有意想不到嘅效果。最經典要數《不法之徒》嘅dancing scene，突然拎走配樂插旁白，觀眾仲以為係咪條片有事。
霸戲哥最印象深刻反而係《周末》，其中一幕用一個長鏡，展示大塞車場面。導演本身對中產主義極度反感，佢借汽車比喻消費主義，而長鏡去到尾係車毀人亡嘅畫面，箇中意義顯然而見。
感謝尚盧高達為現代電影帶來衝擊，霸戲哥亦趁呢個機會，向戲癡上司講聲多謝。
