博客文章
王祖藍主持嘅《有個閨密叫祖藍》，霸戲哥一直有追開，佢同一般訪談節目嘅分別，係祖藍同嘉賓建立到份互信，令嘉賓放下戒心，將心底話分享畀觀眾。
今晚呢集嘉賓比較特別，就係00後嘅炎明熹。祖藍大大話話都大佢廿年，兩個就算冇代溝，又點樣做到閨密呢？
GiGi參加《聲夢傳奇》奪冠後入行，後來北上參加芒果TV同TVB合辦嘅《聲生不息》，紅遍全中國，成名前後不足兩年，好難想像一個17歲嘅中學生，竟然可以承受到咁大壓力。
貴為「火星女神」，喺節目少不免展現無厘頭風格，祖藍明顯招架不住，不過GiGi都有分享After Class成員Chantel、Yumi同Windy之間嘅關係，同埋點解咁怕同人溝通嘅真相。
想了解GiGi更多鮮為人知嘅一面，就要留意今晚節目。
霸戲哥
** 博客文章文責自負,不代表本公司立場 **
世上已經冇任何嘢可以阻擋荷里活繼續虛偽落去。盛行嘅左膠風潮不停吹奏政治要正確，連電影娛樂都無一倖免，頗有美國文化大革命色彩。
最新被政治正確「洗劫」嘅文化產物，係你我嘅童年回憶動畫《小魚仙》。話說迪士尼又重拍真人版，近日釋出嘅預告曝光，但我哋熟悉嘅白雪雪Ariel，突然變成黑人歌手Halle Bailey出演，嗰種突如其來嘅反差實在太難令人接受。
迪士尼嘅用意明顯不過，純粹想打破白人壟斷話語權嘅框架，而呢種race swapping嘅手法，近年喺唔同作品不斷出現，好似之前霸戲哥介紹過嘅真人版《木偶奇遇記》，就搵咗非裔女星Cynthia Erivo扮藍仙女，都已經畀人話不倫不類。
成件事根本唔關演員係黑人定白人問題，係本身原角色係白人，做乜多舊魚為改而改？再者，如果唔撐套戲，又係咪等同種族歧視呢？點解係都要將兩樣嘢夾硬綑綁，
呢種極端嘅矯枉過正，其實更有逆向歧視嘅成分。
霸戲哥留名等睇黑人扮嘅白雪公主。
