博客文章
相信大家仲記得《阿凡達》09年上映嗰陣，個個以撲到IMAX 3D戲飛為榮，有人瘋狂到二刷三刷，冇睇過就好似跟唔上潮流咁。老實講，霸戲哥都係去到好水尾先接觸呢部戲，主因係覺得Avatar音譯做阿凡達實在娘爆，而睇完又唔係真係覺得好震撼啫。
事隔13年，世界已經變晒，終於等到《阿凡達》續集上映。但喺續集上映之前，電影公司先嚟cap水，安排聽日重映《阿凡達》4K重製版，等後生嗰輩感受吓氣氛先，咁嚟緊12月續集上映又可以斬多一水。聽聞自Fox與Disney合併後，原本《阿凡達》安排咗喺Disney+上架，但早排突然抽起，原來就係等人買飛入場。
話晒係4K重製版，視覺特效梗係更加精緻，今日重溫都唔會覺得outdate，好似係。
霸戲哥
** 博客文章文責自負,不代表本公司立場 **
香港人生活節奏急促，個個都話唔得閒煮飯，寧願叫foodpanda同捱罐頭。霸戲哥住hall嗰陣，都成日食罐頭，水仙花牌五香肉丁、肥豬仔午餐肉、三花牌腸仔係「醫肚三寶」，貪佢一開罐倒落個麵度就食得。
罐頭食品種類繁多，但係咪真係咁好食先？好似豆豉鯪魚咁，霸戲哥覺得腥到暈好怕食。後來聽人講，原來仲有種「極品」叫瑞典鹽醃鯡魚，瑞典文surströmming，齋睇個名已經似嘔吐物，極唔開胃。但當你打開蓋，嗰陣強烈嘅臭味令人作嘔，全因裏面嘅細菌經過發酵，產生極多難聞氣體如硫化氫、丙酸同丁酸，所以比腐屍還要臭，試問又點擺得落口？
今晚J2節目《關注關注組》，主題係罐頭食物，施焯日同蔡景行仲化身試食死士，挑戰德國「忌廉辣汁緋魚」，聽個名就知「硬嘢」啦。想知德國定瑞典難啃啲，就要留意節目啦。
