博客文章
香港人生活節奏急促，個個都話唔得閒煮飯，寧願叫foodpanda同捱罐頭。霸戲哥住hall嗰陣，都成日食罐頭，水仙花牌五香肉丁、肥豬仔午餐肉、三花牌腸仔係「醫肚三寶」，貪佢一開罐倒落個麵度就食得。
罐頭食品種類繁多，但係咪真係咁好食先？好似豆豉鯪魚咁，霸戲哥覺得腥到暈好怕食。後來聽人講，原來仲有種「極品」叫瑞典鹽醃鯡魚，瑞典文surströmming，齋睇個名已經似嘔吐物，極唔開胃。但當你打開蓋，嗰陣強烈嘅臭味令人作嘔，全因裏面嘅細菌經過發酵，產生極多難聞氣體如硫化氫、丙酸同丁酸，所以比腐屍還要臭，試問又點擺得落口？
今晚J2節目《關注關注組》，主題係罐頭食物，施焯日同蔡景行仲化身試食死士，挑戰德國「忌廉辣汁緋魚」，聽個名就知「硬嘢」啦。想知德國定瑞典難啃啲，就要留意節目啦。
霸戲哥
** 博客文章文責自負,不代表本公司立場 **
霸戲哥唔少朋友過咗英國冇耐，仲物色緊心水靚屋，不時send啲靚相嚟問我意見。睇得豪宅都心郁郁，可惜自己冇能力住，惟有上網睇吓啲豪宅節目。
咁啱Netflix有齣真人騷《橘郡地產熱》（Selling the OC），見到簡介幾吸引，就click咗入去睇。結果第一集頭幾分鐘，就介紹一個叫價1億美金嘅超級荀盤，成間屋全海景對住太平洋，裝潢有格調氣派唔在講，間主人房個天窗仲可以調校嚟睇星架！
唔止豪宅大，班地產經紀身材都唔細，個個好似僭建過咁吓吓晒出嚟，做地產真係唔容易。節目雖然係真人騷，但霸戲哥認為好多都係根劇本處理嘅（scripted），有幾成真只有佢哋先知嘞。不過，聽聞班地產靚仔靚女，係真係Oppenheim Real Estate嘅員工嚟嘅。
睇睇吓個節目，先發現主菜唔係睇豪宅，係睇班地產女勾心鬥角，當中梗唔少得係話人賣樓賣埋「床單」啦。或者觀眾睇開《地產孖寶》（Selling Sunset），已經習慣咗個節目模式，但啲女嘅爭風呷醋就唔係霸戲哥杯茶嘞。
