霸戲哥之日常#418｜ 地產熱

霸戲哥唔少朋友過咗英國冇耐，仲物色緊心水靚屋，不時send啲靚相嚟問我意見。睇得豪宅都心郁郁，可惜自己冇能力住，惟有上網睇吓啲豪宅節目。

咁啱Netflix有齣真人騷《橘郡地產熱》（Selling the OC），見到簡介幾吸引，就click咗入去睇。結果第一集頭幾分鐘，就介紹一個叫價1億美金嘅超級荀盤，成間屋全海景對住太平洋，裝潢有格調氣派唔在講，間主人房個天窗仲可以調校嚟睇星架！

唔止豪宅大，班地產經紀身材都唔細，個個好似僭建過咁吓吓晒出嚟，做地產真係唔容易。節目雖然係真人騷，但霸戲哥認為好多都係根劇本處理嘅（scripted），有幾成真只有佢哋先知嘞。不過，聽聞班地產靚仔靚女，係真係Oppenheim Real Estate嘅員工嚟嘅。

睇睇吓個節目，先發現主菜唔係睇豪宅，係睇班地產女勾心鬥角，當中梗唔少得係話人賣樓賣埋「床單」啦。或者觀眾睇開《地產孖寶》（Selling Sunset），已經習慣咗個節目模式，但啲女嘅爭風呷醋就唔係霸戲哥杯茶嘞。

霸戲哥

** 博客文章文責自負,不代表本公司立場 **

華納兄弟宣佈「將」會開拍《魔間行者》續集，主角John Constantine就梗係搵番奇洛李維斯，因為易角肯定冇人睇，導演就繼續由Francis Lawrence執導。至於「將」係幾時相信冇人會答到，導演手頭上仲有《飢餓遊戲》前傳，同Netflix嘅project喺手，估計最快都要2025年。

唔講唔覺，原來《魔間行者》係2005年嘅戲，霸戲哥當年知道偶像奇哥演John Constantine，特登買咗本英文版小說嚟煲，一睇就對呢個角色愛不惜手，當時仲幫自己改咗個花名做「Honstantine」，諗番起都娘爆。Constantine因為食得太多煙（冇記錯係Lucky Strike）搞到患末期肺癌，搞到為人憤世嫉俗，最記得佢開口埋口「SSDD」，即same shit，different day，依家成為咗霸戲哥口頭蟬。

既然續集未有得睇，惟有去Netflix重溫番舊作先，女主角Rachel Weisz真係靚到癲呀。