霸戲哥唔少朋友過咗英國冇耐,仲物色緊心水靚屋,不時send啲靚相嚟問我意見。睇得豪宅都心郁郁,可惜自己冇能力住,惟有上網睇吓啲豪宅節目。

咁啱Netflix有齣真人騷《橘郡地產熱》(Selling the OC),見到簡介幾吸引,就click咗入去睇。結果第一集頭幾分鐘,就介紹一個叫價1億美金嘅超級荀盤,成間屋全海景對住太平洋,裝潢有格調氣派唔在講,間主人房個天窗仲可以調校嚟睇星架!

唔止豪宅大,班地產經紀身材都唔細,個個好似僭建過咁吓吓晒出嚟,做地產真係唔容易。節目雖然係真人騷,但霸戲哥認為好多都係根劇本處理嘅(scripted),有幾成真只有佢哋先知嘞。不過,聽聞班地產靚仔靚女,係真係Oppenheim Real Estate嘅員工嚟嘅。

睇睇吓個節目,先發現主菜唔係睇豪宅,係睇班地產女勾心鬥角,當中梗唔少得係話人賣樓賣埋「床單」啦。或者觀眾睇開《地產孖寶》(Selling Sunset),已經習慣咗個節目模式,但啲女嘅爭風呷醋就唔係霸戲哥杯茶嘞。




霸戲哥

** 博客文章文責自負,不代表本公司立場 **