博客文章
國際賽周完結，意味住英超戰火重燃。今星期戲碼強勁，分別上映兩場打吡大戰，今晚先嚟北倫敦打吡阿仙奴對熱刺，而聽晚就有曼市打吡。
每次北倫敦打吡，霸戲哥都會私訊兒時死黨補習天王T打吓牙骱。由細到大佢捧阿仙奴，霸戲哥就熱刺，無論兩隊經歷高潮低潮，我哋都一心守護愛隊，視對敵係死敵。話時話，下次北倫敦打吡，補習天王T應該已經喺英國了。
論近年往績，北倫敦打吡嘅作客球隊未贏過。但紀錄係要嚟破嘅，熱刺今季四把尖刀簡尼、孫興文、古路錫斯基同李察利臣輪住磨，死火嘅孫仔上場都撻着番，唯一暗湧係門將羅理斯可能傷勢未癒，唔係呢場十拿九穩。
至於曼市打吡，我諗邊隊作客都冇乜關係啦，賽果只不過係大炒定小勝啫。曼城前鋒夏蘭入球停不了，曼聯有邊個守將mark得實佢？唔通真係出麥佳亞咩！
霸戲哥
** 博客文章文責自負,不代表本公司立場 **
屹立九龍城近半世紀嘅豪華餅店，原本做埋今日就散band，但最新消息係有「白武士」接手，將舊舖大翻新後原址重開，盡量用返原名（好似叫香港豪華餅家1977）賣撻。
話執唔執彈出彈入，最唔開心梗係一班山長水遠撲入嚟排長龍買蛋撻嘅「緬懷膠」，仲諗住打完卡送你一程，點知轉過頭你同我講復活。
霸戲哥好理性嘅，絕對唔會跟紅頂白，一間老店小店要執笠，梗有佢原因，亦都冇話可唔可惜。不過對上一次食豪華餅店嘅蛋撻（約莫兩年前），都依然係好味嘅。
講起豪華餅店，又令霸戲哥諗番起一件趣事。話說有年發哥生日，公司打算搵人唱首生日歌俾佢聽。霸戲哥知道發哥成日幫襯豪華，就搵兩位豪華姐姐去唱。起初兩位阿姐見我搞搞震冇幫襯，又失驚無神隊個cam埋嚟，梗係say no啦，點知後來知道係賀發哥，當堂態度180度轉變，記憶中仲拍咗幾個take。
發哥係堅嘅！
