霸戲哥之日常#432｜ 豪華蛋撻

屹立九龍城近半世紀嘅豪華餅店，原本做埋今日就散band，但最新消息係有「白武士」接手，將舊舖大翻新後原址重開，盡量用返原名（好似叫香港豪華餅家1977）賣撻。

話執唔執彈出彈入，最唔開心梗係一班山長水遠撲入嚟排長龍買蛋撻嘅「緬懷膠」，仲諗住打完卡送你一程，點知轉過頭你同我講復活。

霸戲哥好理性嘅，絕對唔會跟紅頂白，一間老店小店要執笠，梗有佢原因，亦都冇話可唔可惜。不過對上一次食豪華餅店嘅蛋撻（約莫兩年前），都依然係好味嘅。

講起豪華餅店，又令霸戲哥諗番起一件趣事。話說有年發哥生日，公司打算搵人唱首生日歌俾佢聽。霸戲哥知道發哥成日幫襯豪華，就搵兩位豪華姐姐去唱。起初兩位阿姐見我搞搞震冇幫襯，又失驚無神隊個cam埋嚟，梗係say no啦，點知後來知道係賀發哥，當堂態度180度轉變，記憶中仲拍咗幾個take。

發哥係堅嘅！

霸戲哥

** 博客文章文責自負,不代表本公司立場 **

政府公佈放寛防疫措施「0+3」，打工仔個個掛住捕實個芒撲機票，手頭工作都唔理。見到豬視妹都有偷偷瀏覽旅遊資訊，相信今年內都要飛番轉。

霸戲哥之前講過對泰國印象麻麻，但自從追開胡慧沖個《沖遊泰國》，慢慢對當地改觀。

噚晚嗰集介紹咗兩個景點：一個係全泰國最一正宗嘅法國餐廳LeVipa，另一個係位於曼谷極具人氣嘅夜市Jodd Fairs。霸戲哥麻麻哋法國菜，加上價錢咁貴，想食都食唔起。反而之後介紹嘅夜市就好有睇頭，成個area總共200幾個檔口，超過半數係食店，真係齋行都行你幾粒鐘。

啲食店為咗標奇立異，乜嘢古靈精怪嘢都有得食，豬視妹睇中咗雜錦海鮮桶，啲蝦蟹一嘢倒上張枱度用火燒，又幾夠霸氣嘅。

唔講唔覺呢輯《沖遊泰國》原來去到尾聲，睇埋今晚同聽晚兩集，或者可以plan定之後嘅行程。