博客文章
政府公佈放寛防疫措施「0+3」，打工仔個個掛住捕實個芒撲機票，手頭工作都唔理。見到豬視妹都有偷偷瀏覽旅遊資訊，相信今年內都要飛番轉。
霸戲哥之前講過對泰國印象麻麻，但自從追開胡慧沖個《沖遊泰國》，慢慢對當地改觀。
噚晚嗰集介紹咗兩個景點：一個係全泰國最一正宗嘅法國餐廳LeVipa，另一個係位於曼谷極具人氣嘅夜市Jodd Fairs。霸戲哥麻麻哋法國菜，加上價錢咁貴，想食都食唔起。反而之後介紹嘅夜市就好有睇頭，成個area總共200幾個檔口，超過半數係食店，真係齋行都行你幾粒鐘。
啲食店為咗標奇立異，乜嘢古靈精怪嘢都有得食，豬視妹睇中咗雜錦海鮮桶，啲蝦蟹一嘢倒上張枱度用火燒，又幾夠霸氣嘅。
唔講唔覺呢輯《沖遊泰國》原來去到尾聲，睇埋今晚同聽晚兩集，或者可以plan定之後嘅行程。
霸戲哥
** 博客文章文責自負,不代表本公司立場 **
每年萬聖節總會有鬼片上映嚟趁吓熱鬧，今年就有天下一出品嘅《猛鬼3寶》，日前發佈咗終極預告。霸戲哥最鍾意佢句tag：邊個唔睇，邊個就係鬼！食應「捉鬼」熱潮。
《猛鬼3寶》由3個都市鬼故事串連，劇組拍戲撞女鬼；party room爆房畀色鬼纏；小鬼唔肯投胎流連快拆卸嘅商場。導演同編劇係《金都》拍檔黃鐦同黃綺琳，佢兩個合作無間，鬼主意又特別多，相信套戲唔會係一般鬧劇咁簡單。演員組合係清一色生力軍，凌文龍、岑珈其、陳湛文、周祉君、蘇致豪、許賢、鍾雪瑩等，完全感受到戲裏戲外嘅活力。
霸戲哥早幾年搞過一個短片招募project，想發掘啲年輕又有創意嘅導演，就膽粗粗搵黃鐦傾合作。結果佢唔使一晚時間，就度咗三個創意爆燈嘅故仔，真係嚇咗霸戲哥一跳。可惜後來公司有條茂李搞衰咗個project，最終都無緣合作，諗番起都覺得虧欠咗導演。
往事已矣，相信黃鐦同黃綺琳兩位導演，未來必定會喺影壇大放異彩。
