霸戲哥之日常#430｜ 雙黃搞鬼

每年萬聖節總會有鬼片上映嚟趁吓熱鬧，今年就有天下一出品嘅《猛鬼3寶》，日前發佈咗終極預告。霸戲哥最鍾意佢句tag：邊個唔睇，邊個就係鬼！食應「捉鬼」熱潮。

《猛鬼3寶》由3個都市鬼故事串連，劇組拍戲撞女鬼；party room爆房畀色鬼纏；小鬼唔肯投胎流連快拆卸嘅商場。導演同編劇係《金都》拍檔黃鐦同黃綺琳，佢兩個合作無間，鬼主意又特別多，相信套戲唔會係一般鬧劇咁簡單。演員組合係清一色生力軍，凌文龍、岑珈其、陳湛文、周祉君、蘇致豪、許賢、鍾雪瑩等，完全感受到戲裏戲外嘅活力。

霸戲哥早幾年搞過一個短片招募project，想發掘啲年輕又有創意嘅導演，就膽粗粗搵黃鐦傾合作。結果佢唔使一晚時間，就度咗三個創意爆燈嘅故仔，真係嚇咗霸戲哥一跳。可惜後來公司有條茂李搞衰咗個project，最終都無緣合作，諗番起都覺得虧欠咗導演。

往事已矣，相信黃鐦同黃綺琳兩位導演，未來必定會喺影壇大放異彩。

霸戲哥

** 博客文章文責自負,不代表本公司立場 **

今日啲風特別旺，今朝先寫完《暴風之年》，晏晝就傳來影壇好消息，由翁子光執導，霸戲哥偶像郭富城、豬視妹偶像梁朝偉，兩大影帝聯手主演嘅電影《風再起時》，將代表香港角逐第95屆奧斯卡金像獎最佳國際影片，亦係史上第五套香港作品角逐該獎，前四套分別係張藝謀嘅《大紅燈籠高高掛》，陳凱歌嘅《霸王別姬》，王家衞嘅《一代宗師》，同埋曾國祥嘅《少年的你》。

《風再起時》以「四大探長」事跡為題材，郭富城飾演「磊樂」（呂樂）探長、梁朝偉飾演「南江」（藍剛）探長、譚耀文飾演「嚴洪」（顏雄），周文健飾演「肥B」（韓森）。鍾意港產片嘅讀者，對四大探長嘅故事絕對唔會陌生，但以翁子光嘅視嘢，相信會拍出一個唔同嘅角度同視野。

早前《風再起時》喺香港國際電影節首映，門票極速售罄，有幸觀摩呢套戲嘅人唔多，霸戲哥同豬視妹梗係心急想睇啦，不過暫時呢刻都未有確實映期。但可以肯定嘅係，港產片呢浸強勢仍然會持續一輪。