霸戲哥之日常#438｜ 美麗晒冷

之前有報道講過話活地阿倫宣佈退休唔拍戲，好彩香港仲有個「MK活地阿倫」葉念琛，佢監製、編劇同執導嘅TVB台慶劇《美麗戰場》今晚開播，大家又可以留名等睇愛情金句。

霸戲哥同豬視妹坐定定睇咗頭一集，感覺都唔錯，節奏明快，係啲劇情稍為娘少少，不過完全符合葉念琛嘅風格。叫得《美麗戰場》，唔少得梗係靚女晒冷，第一集已經有陳瀅、陳曉華、劉佩玥、蔣家旻、郭柏妍同游嘉欣登場，高登仔收晒貨啦。

睇開葉念琛嘅戲，都知道女主角一定叫「阿寶」，「琪琪」就多數都係奸嘅，今次嘅「阿寶」係陳瀅，而「琪琪」就係蔣家旻。喺「葉念琛電影宇宙」入面，蔣家旻都做過「阿寶」嘅，就係電影《第一次不是你》入面扮演援交少女。始終撈過電影，感覺上蔣家旻演技，比起其他靚女有層次。

至於大家最期待畫面、葉念琛御用男主角「万刀甲」只係出一出場，想睇佢嘅演出，可能要等多幾集嘞。

霸戲哥

** 博客文章文責自負,不代表本公司立場 **

荷李活興起翻拍熱潮，最近傳出要翻拍嘅經典，就係1999年上映嘅《美國處男》（American Pie）。其實嚴格嚟講算唔上咩大片，但佢以刀仔鋸大樹方式，用1100萬美元成本，斬咗2.3億美元，都咪話唔癲。

至於點解翻拍，最大可能梗係賤賣集體回憶斬多幾両啦，但亦有個說法係套戲始終廿幾年前，片入面好多橋段都政治唔正確，好似套戲冇乜黑人已經死罪，至於Nadia畀人裝cam偷拍除衫條橋，又肯定畀女權份子炸到體無完膚。廿年前邊有咁多左膠同道德L，就算有都唔會好似依家咁大聲啦。

霸戲哥好記得當年住緊hall，係借hallmate啲老翻VCD睇嘅，套戲講中晒我哋呢班大學生嘅心聲，又想嚐禁果又淆底咁囉，唔知有冇人真係買個pie嚟破處呢？

新版傳由美籍南亞裔女導演Sujata Day負責，如果政治正確，又會唔會咁賣座呢？真係要放長雙眼睇囉。