霸戲哥之日常#437｜ 美國處男

荷李活興起翻拍熱潮，最近傳出要翻拍嘅經典，就係1999年上映嘅《美國處男》（American Pie）。其實嚴格嚟講算唔上咩大片，但佢以刀仔鋸大樹方式，用1100萬美元成本，斬咗2.3億美元，都咪話唔癲。

至於點解翻拍，最大可能梗係賤賣集體回憶斬多幾両啦，但亦有個說法係套戲始終廿幾年前，片入面好多橋段都政治唔正確，好似套戲冇乜黑人已經死罪，至於Nadia畀人裝cam偷拍除衫條橋，又肯定畀女權份子炸到體無完膚。廿年前邊有咁多左膠同道德L，就算有都唔會好似依家咁大聲啦。

霸戲哥好記得當年住緊hall，係借hallmate啲老翻VCD睇嘅，套戲講中晒我哋呢班大學生嘅心聲，又想嚐禁果又淆底咁囉，唔知有冇人真係買個pie嚟破處呢？

新版傳由美籍南亞裔女導演Sujata Day負責，如果政治正確，又會唔會咁賣座呢？真係要放長雙眼睇囉。

霸戲哥

** 博客文章文責自負,不代表本公司立場 **

最近有「開心大發現」，原來Disney+唔淨止得Marvel、Disney同Pixar嘅影視作品。除咗即將上架嘅經典亞視劇《我和僵屍有個約會》之外，居然有梁仲文套cyberpunk作品《香港大師》。

《香港大師》屬於小眾嘅獨立電影，17年上映時未必太多人留意，但認識梁仲文嘅人，都知道佢有料到。當年舊老細獨具慧眼，吩咐霸戲哥搵仲文做訪問，後來仲成為咗老友添。

梁仲文嘅「響朵」之作係《關公大戰外星人》，點子多到不得了，最厲害「用蔗渣嘅價錢，拍出燒鵝嘅味道」，喺港產科幻片同特撮片，仲文絕對係獨當一面，難怪廣告商每次想拍特撮嘢，九成九都係搵佢。

誠意推介大家睇《香港大師》，你會發現香港其實臥虎藏龍，創意同點子從來不缺。