荷李活興起翻拍熱潮,最近傳出要翻拍嘅經典,就係1999年上映嘅《美國處男》(American Pie)。其實嚴格嚟講算唔上咩大片,但佢以刀仔鋸大樹方式,用1100萬美元成本,斬咗2.3億美元,都咪話唔癲。

至於點解翻拍,最大可能梗係賤賣集體回憶斬多幾両啦,但亦有個說法係套戲始終廿幾年前,片入面好多橋段都政治唔正確,好似套戲冇乜黑人已經死罪,至於Nadia畀人裝cam偷拍除衫條橋,又肯定畀女權份子炸到體無完膚。廿年前邊有咁多左膠同道德L,就算有都唔會好似依家咁大聲啦。

霸戲哥好記得當年住緊hall,係借hallmate啲老翻VCD睇嘅,套戲講中晒我哋呢班大學生嘅心聲,又想嚐禁果又淆底咁囉,唔知有冇人真係買個pie嚟破處呢?

新版傳由美籍南亞裔女導演Sujata Day負責,如果政治正確,又會唔會咁賣座呢?真係要放長雙眼睇囉。




霸戲哥

** 博客文章文責自負,不代表本公司立場 **