博客文章
最近有「開心大發現」，原來Disney+唔淨止得Marvel、Disney同Pixar嘅影視作品。除咗即將上架嘅經典亞視劇《我和僵屍有個約會》之外，居然有梁仲文套cyberpunk作品《香港大師》。
《香港大師》屬於小眾嘅獨立電影，17年上映時未必太多人留意，但認識梁仲文嘅人，都知道佢有料到。當年舊老細獨具慧眼，吩咐霸戲哥搵仲文做訪問，後來仲成為咗老友添。
梁仲文嘅「響朵」之作係《關公大戰外星人》，點子多到不得了，最厲害「用蔗渣嘅價錢，拍出燒鵝嘅味道」，喺港產科幻片同特撮片，仲文絕對係獨當一面，難怪廣告商每次想拍特撮嘢，九成九都係搵佢。
誠意推介大家睇《香港大師》，你會發現香港其實臥虎藏龍，創意同點子從來不缺。
霸戲哥
** 博客文章文責自負,不代表本公司立場 **
今個10月，MIRROR終於全面復工。四齣由佢哋主演嘅ViuTV劇《野人老師》、《季前賽》、《百萬同居計劃》同拳擊劇《繩角》將會推出，鏡粉唔使再牽腸掛肚，日日捕住個芒等偶像update搞到茶飯不思。
但鏡粉最期待嘅，可能係Makerville嘅交代。MIRROR演唱會事故發生咗兩個月
，Makerville依然採取龜縮態度，好似當件事冇發生咁，心存僥倖博大家唔記得。如果唔係要拎王牌劇出嚟撼無綫嘅台慶劇，或者VIuTV真係會一直擺喺倉底都未定。
霸戲哥深信MIRROR都好想為阿Mo發聲，奈何公司應該落晒柯打，一律禁止發表相關言論，嗰種有冤無路訴嘅心情先至係最糾結。
做人冇公關真係食得屎。或者ViuTV真係要好好諗吓呢個問題，唔好拖累MIRROR嘅發展，令一眾鏡粉心碎。
