霸戲哥之日常#439｜ 重陽雜談

今日係重陽節，漢代相傳「重九」最初只屬民間迷信，百姓要登高先可以遠離災禍。後世慢慢演變成憑弔先人嘅傳統節日。中國有春秋二祭，重陽就係秋祭。
秋祭咁文雅，聽落唔慣，講「拜山」就地道好多，又設合港人嗰種連拜山都嫌麻煩又趕頭趕命嘅特性。
香港連墳場都好有特色，一個個骨灰位排到密麻麻，外國人嚟到梗係嚇一跳。當年《世紀戰疫》嚟香港拍攝，就去咗荃灣華人永遠墳場度取景。
至於港產片呢，最經典梗係陳果套《香港製造》，入面有好多場景都喺粉嶺和合石墳場度拍，當中梗係有隱喻喺入面啦。
早幾年霸戲哥約陳果導演重遊舊地做訪問，事前一早拜晒土地做晒儀式，點知roll機嗰陣依然係怪事連連，到第日霸戲哥踢波仲斷埋Achille’s tendon，要大唞半年，都咪話唔邪。
依家寫番呢段經歷出嚟，個心仲怯怯哋呀。

霸戲哥

** 博客文章文責自負,不代表本公司立場 **

之前有報道講過話活地阿倫宣佈退休唔拍戲，好彩香港仲有個「MK活地阿倫」葉念琛，佢監製、編劇同執導嘅TVB台慶劇《美麗戰場》今晚開播，大家又可以留名等睇愛情金句。

霸戲哥同豬視妹坐定定睇咗頭一集，感覺都唔錯，節奏明快，係啲劇情稍為娘少少，不過完全符合葉念琛嘅風格。叫得《美麗戰場》，唔少得梗係靚女晒冷，第一集已經有陳瀅、陳曉華、劉佩玥、蔣家旻、郭柏妍同游嘉欣登場，高登仔收晒貨啦。

睇開葉念琛嘅戲，都知道女主角一定叫「阿寶」，「琪琪」就多數都係奸嘅，今次嘅「阿寶」係陳瀅，而「琪琪」就係蔣家旻。喺「葉念琛電影宇宙」入面，蔣家旻都做過「阿寶」嘅，就係電影《第一次不是你》入面扮演援交少女。始終撈過電影，感覺上蔣家旻演技，比起其他靚女有層次。

至於大家最期待畫面、葉念琛御用男主角「万刀甲」只係出一出場，想睇佢嘅演出，可能要等多幾集嘞。