霸戲哥之日常#441｜ 閃避球

今個星期有鄭伊健同周家怡主演嘅《深宵閃避球》上畫，睇吓有冇機會食住港產片個勢，延續票房神話。

故事以較冷門嘅「閃避球」為題材，講述周家怡扮演嘅外展社工，一直鼓勵一班夜歸問題少女，深宵參與閃避球運動，仲聘請咗伊健做coach，報名參加全港閃避球錦標賽。

閃避球即係Dodgeball，喺外國都幾hit，但港人對佢認知唔多，霸戲哥童年就更少之有少。第一次認識閃避球，應該係細個玩任天堂紅白機嘅時候，當時《熱血高校》好hit，遊戲公司乘勢推出咗個《熱血躲避球》game。記得霸戲哥一放學就去同學屋企玩，玩玩吓仲嚟真搵排球堅掟，搞到得罪唔少同學仔。後來電腦又推出咗隻類似嘅game，好似叫《爆笑躲避球》，角色變晒三國人物，仲識出絕招，唔知年長一輩嘅讀者有冇玩過呢？

講番套戲，雖然話係喜劇，但睇得出導演有啲message想講，霸戲哥最鍾意預告句tag —「喺邊度跌低，就要喺邊度再跌低。」同《一秒拳王》嘅 「避唔到，就捱」一脈相承噃。

相信港人一定有feel。

霸戲哥

** 博客文章文責自負,不代表本公司立場 **

最近留意到唔少人讚劉嘉玲越老越靚，60歲嘅梁朝偉又何嘗唔係越老越型！

噚日偉日飛去韓國首爾，出席第27屆釜山國際電影節，領取亞洲電影人獎。着住白色醒神西裝襯黑色西褲嘅佢，喺紅地毯上笑容滿面，又不停同記者朋友揮手，咁親民，唔怪得豬視妹咁嗒佢糖啦。

今次電影節為咗隆重其事，特登舉辦咗個偉仔作品展，喺佢從影40年以嚟揀出6部代表作嚟播映，分別係《射鵰英雄傳之東成西就》、《春光乍洩》、《暗花》、《花樣年華》、《無間道》同埋《2046》。聽聞呢六部都係偉仔自己㨂嘅。

霸戲歌奇怪點解唔揀《色，戒》呢，明明韓國人應該好鍾意湯唯嘛。