霸戲哥之日常#451｜ 照抄冇運行

說來慚愧，若不是朋友傳來短訊，問霸戲哥有冇睇過《就是青春》，真係唔知開電視都有自家製嘅選秀節目。聽聞首集收視得0.4點，以周末黃金時段來講，真係叫做唔合格。

余詠珊自從過咗開電視之後，旗下製作公司「好好製作」不停推出「新嘢」，好似狙擊港姐嘅水着選美《Summer Girls 2022》及《疫境中的餐桌》咁，不過都係一味跟風，將人哋嘅成功方程式倒模照dup，完全冇新意。

今次呢個《就是青春》，霸戲哥上網翻睇咗，感覺就似將TVB嘅《聲夢傳奇》同ViuTV嘅《全民造星》嘅元素炒埋一碟。就連參選嘅新人，花名都要叫做「炎明熹勁敵」、 「翻版胡鴻鈞」，咁，點解我仲要睇你呢？

公道講，班新秀其實都幾有潛質，只可惜參加呢個節目，想有人留意都幾難。到時唔係「就是青春」，而係「就是蹉跎青春」就gg了。

霸戲哥

** 博客文章文責自負,不代表本公司立場 **

好記得澳洲傳奇歌后Helen Reddy當日離世，傳媒居然冇鋪天蓋地式報道，或者呢代人對佢認知唔深啦。Helen絕對係七十年代最具代表性嘅女權人物，每當電台播佢首《I am Woman》，霸戲媽就會扭大個收音機，聽得多，霸戲哥自然都毛管戙埋。

唔好畀個戲名悶親，《歌聲伴我心》其實就係Helen Reddy嘅傳記片，由佢帶住個3歲女嚟紐約追夢講起，至慢慢發展佢嘅歌唱事業，到後來面對家庭、事業嘅困難，最終成為現代女性嘅典範。套路其實有啲似《梅艷芳》。

套戲其實喺2019年多倫多電影節舉行過首映，只係後來因covid影響晒映期，到今日香港先有得睇。雖然自從荷李活吹奏起#MeToo風潮，今日再講女權，或者會令人覺得有啲左膠，但的而且確，Helen Reddy喺嗰個年代打破父權制嘅規範，激勵好多女性為變革而戰。

霸戲媽肯定係其中之一。