博客文章
好記得澳洲傳奇歌后Helen Reddy當日離世，傳媒居然冇鋪天蓋地式報道，或者呢代人對佢認知唔深啦。Helen絕對係七十年代最具代表性嘅女權人物，每當電台播佢首《I am Woman》，霸戲媽就會扭大個收音機，聽得多，霸戲哥自然都毛管戙埋。
唔好畀個戲名悶親，《歌聲伴我心》其實就係Helen Reddy嘅傳記片，由佢帶住個3歲女嚟紐約追夢講起，至慢慢發展佢嘅歌唱事業，到後來面對家庭、事業嘅困難，最終成為現代女性嘅典範。套路其實有啲似《梅艷芳》。
套戲其實喺2019年多倫多電影節舉行過首映，只係後來因covid影響晒映期，到今日香港先有得睇。雖然自從荷李活吹奏起#MeToo風潮，今日再講女權，或者會令人覺得有啲左膠，但的而且確，Helen Reddy喺嗰個年代打破父權制嘅規範，激勵好多女性為變革而戰。
霸戲媽肯定係其中之一。
霸戲哥
** 博客文章文責自負,不代表本公司立場 **
霸戲哥之前都講過，上得TVB節目《全城一叮》嘅藝員，咁難得可以喺台上做幾分鐘主角，梗係要將看家本領晒冷。
點知噚晚播出嗰集，其中一位參賽者表演影子舞加講故事，故事講咗半分鐘都唔吸引，啲影子更加乏善足陳，霸戲歌仲同豬視妹講，乜咁甩皮甩骨都拎出嚟表演？現場觀眾比霸戲哥有耐性，睇咗近兩分鐘先叮佢走。
參賽者叫劉家聰，喺演藝圈都打滾咗二十年，主持兒童節目居多，唔認得唔奇。畀人叮走，主持例牌問佢上嚟做乜，潛台詞即係「咁渣都上嚟？」點知背後原因，令霸戲哥愕晒然。
原來劉家聰喺2018年發現腦內生咗個腫瘤，要開腦做八個鐘頭手術。雖然劉家聰喺鬼門關行返出嚟，但反䨱嘅病情令佢經歷半身癱瘓，康復之路漫長。
呢幾年間，劉家聰要做好多復康訓練，重新學習說話、走路同基本四肢動作。換句話講，要令對手聽指揮都唔簡單。
希望今次呢個機會，可以令更多人認識劉家聰，呢位活脫脫嘅生命鬥士。
估唔到一個綜藝節目，有娛樂性之餘，仲帶到咁多正面訊息，抵讚。
