霸戲哥之日常#453｜ 洋蔥一叮

霸戲哥之前都講過，上得TVB節目《全城一叮》嘅藝員，咁難得可以喺台上做幾分鐘主角，梗係要將看家本領晒冷。

點知噚晚播出嗰集，其中一位參賽者表演影子舞加講故事，故事講咗半分鐘都唔吸引，啲影子更加乏善足陳，霸戲歌仲同豬視妹講，乜咁甩皮甩骨都拎出嚟表演？現場觀眾比霸戲哥有耐性，睇咗近兩分鐘先叮佢走。

參賽者叫劉家聰，喺演藝圈都打滾咗二十年，主持兒童節目居多，唔認得唔奇。畀人叮走，主持例牌問佢上嚟做乜，潛台詞即係「咁渣都上嚟？」點知背後原因，令霸戲哥愕晒然。

原來劉家聰喺2018年發現腦內生咗個腫瘤，要開腦做八個鐘頭手術。雖然劉家聰喺鬼門關行返出嚟，但反䨱嘅病情令佢經歷半身癱瘓，康復之路漫長。

呢幾年間，劉家聰要做好多復康訓練，重新學習說話、走路同基本四肢動作。換句話講，要令對手聽指揮都唔簡單。

希望今次呢個機會，可以令更多人認識劉家聰，呢位活脫脫嘅生命鬥士。

估唔到一個綜藝節目，有娛樂性之餘，仲帶到咁多正面訊息，抵讚。

霸戲哥

** 博客文章文責自負,不代表本公司立場 **

最近有Now電影積分到期，就上官網摷吓有冇好戲，無意中發現有套法國電影《肉罷不能》，即刻買嚟睇，一睇真係欲罷不能！

套戲由鬼才導演Fabrice Eboué自編自導自演，故事結構極之簡單，講一對開肉店嘅夫婦，某次意外撞死左我個「素食L」，決定肢解對方毀屍滅跡。老公後來唔小心將人肉賣畀客人，點知大獲好評，人人食過翻尋味。夫婦於是展開狩獵大計，確保「世一鮮肉」無限量供應。咪即係法式《人肉叉燒包》！

套戲最厲害地方，係佢嘅政治極不正確，將宗教、種族、性別、素食等敏感議題玩到盡，又因為用黑色幽默嚟包裝，觀眾就算唔啱聽都要焗住陪笑。

霸戲哥平生最討厭偽善撚，佢哋永遠都有雙重標準，仲要將自己套標準加諸人哋身上，而不知自己將個龍門搬嚟搬去。

其實無論人類食唔食肉，都冇辦法改變人類係邪惡根源呢個事實。你當然有唔食肉嘅自由，但唔該唔好以為自己食素就高人一等囉。