博客文章
最近有Now電影積分到期，就上官網摷吓有冇好戲，無意中發現有套法國電影《肉罷不能》，即刻買嚟睇，一睇真係欲罷不能！
套戲由鬼才導演Fabrice Eboué自編自導自演，故事結構極之簡單，講一對開肉店嘅夫婦，某次意外撞死左我個「素食L」，決定肢解對方毀屍滅跡。老公後來唔小心將人肉賣畀客人，點知大獲好評，人人食過翻尋味。夫婦於是展開狩獵大計，確保「世一鮮肉」無限量供應。咪即係法式《人肉叉燒包》！
套戲最厲害地方，係佢嘅政治極不正確，將宗教、種族、性別、素食等敏感議題玩到盡，又因為用黑色幽默嚟包裝，觀眾就算唔啱聽都要焗住陪笑。
霸戲哥平生最討厭偽善撚，佢哋永遠都有雙重標準，仲要將自己套標準加諸人哋身上，而不知自己將個龍門搬嚟搬去。
其實無論人類食唔食肉，都冇辦法改變人類係邪惡根源呢個事實。你當然有唔食肉嘅自由，但唔該唔好以為自己食素就高人一等囉。
霸戲哥
** 博客文章文責自負,不代表本公司立場 **
大家仲記唔記得第一次接觸孖寶兄弟係幾時？霸戲哥就一定係任天堂紅白機年代。遊戲嘅故事設定非常簡單，大魔王庫巴捉走公主，水管佬Mario冒死拯救，過五關斬六將KO魔王抱得美人歸，草根階層嘅一次完勝。
後來Super Mario嘅game越出越多，賽車、運動會、派對game都有，登場角色亦越嚟越複雜同模糊，去到後期開始唔知邊個打邊個，總之玩到隻game就算啦。
孖寶兄弟咁hit，霸戲哥一直都好奇怪點解咁耐都冇推出電影版，直至上年終於宣佈開發，原定今年上畫，最終延期到下年4月。而喺日前嘅Nintendo Direct活動上，播放咗Super Mario電影版預告。大反派當然係庫巴，今次佢帶埋班綠龜雜魚，攻打企鵝王國搶星星，而鏡頭一轉就見到水管佬Mario「穿越」咗去蘑菇村，似乎仲未知道要打大魔王。預告片尾仲見到綠帽王Luigi畀班喪屍追到一仆一碌，唉……
Mario會由Chris Pratt聲演，而Jack Black就會聲演庫巴。當然仲會有Princess Peach同霸戲哥最愛用嘅Donkey Kong登場啦。遲啲套戲有更多資料，霸戲哥會同大家繼續跟進。
