霸戲哥之日常#458｜ 孖寶兄弟

大家仲記唔記得第一次接觸孖寶兄弟係幾時？霸戲哥就一定係任天堂紅白機年代。遊戲嘅故事設定非常簡單，大魔王庫巴捉走公主，水管佬Mario冒死拯救，過五關斬六將KO魔王抱得美人歸，草根階層嘅一次完勝。

後來Super Mario嘅game越出越多，賽車、運動會、派對game都有，登場角色亦越嚟越複雜同模糊，去到後期開始唔知邊個打邊個，總之玩到隻game就算啦。

孖寶兄弟咁hit，霸戲哥一直都好奇怪點解咁耐都冇推出電影版，直至上年終於宣佈開發，原定今年上畫，最終延期到下年4月。而喺日前嘅Nintendo Direct活動上，播放咗Super Mario電影版預告。大反派當然係庫巴，今次佢帶埋班綠龜雜魚，攻打企鵝王國搶星星，而鏡頭一轉就見到水管佬Mario「穿越」咗去蘑菇村，似乎仲未知道要打大魔王。預告片尾仲見到綠帽王Luigi畀班喪屍追到一仆一碌，唉……

Mario會由Chris Pratt聲演，而Jack Black就會聲演庫巴。當然仲會有Princess Peach同霸戲哥最愛用嘅Donkey Kong登場啦。遲啲套戲有更多資料，霸戲哥會同大家繼續跟進。

霸戲哥

** 博客文章文責自負,不代表本公司立場 **

TVB兩齣台慶劇，一齣上流豪門女人鬥，一齣下流賤民發窮惡，兩種口味各有風格。霸戲哥始終比較鍾意後者夠貼地，無殼蝸牛窮一生精力為居住奔波，活脫香港賤民寫照。

首集《下流上車族》夠晒「誠意」，安排兩位新紮靚女郭栢妍、羅毓儀泳裝登場，睇到班連登仔眉飛色舞。霸戲哥就鍾意鮑姐、江美儀、袁文傑同秦啟維呢個演員配搭，就係差咁個鄭則士，集齊一套可以開拍《新肥貓正傳》。

林敏驄飾演車家，08年金融海嘯賣樓，結果一極追唔到樓價，上車夢越來越遠，呢個畸型樓市真係全世界獨有。套劇講中好多港人心聲，抽到公屋真係好過中六合彩，好似Bella同關曜儁呢對夫婦，寧願炒散都唔搵正職， 無謂入息過多要交雙倍租金。

有得住公屋固然係人生勝利組，這些機會不是屬於霸戲哥同豬視妹的。香港就係咁，努力搵錢嘅人，日做18小時，但冇機會申請公屋同居屋，要用血汗錢租私樓住；唔做嘢嘅人，日日hea足24小時，就可以住公屋做土皇帝。

呻完啦，冇咩事霸戲哥返出去開工先。