博客文章
TVB兩齣台慶劇，一齣上流豪門女人鬥，一齣下流賤民發窮惡，兩種口味各有風格。霸戲哥始終比較鍾意後者夠貼地，無殼蝸牛窮一生精力為居住奔波，活脫香港賤民寫照。
首集《下流上車族》夠晒「誠意」，安排兩位新紮靚女郭栢妍、羅毓儀泳裝登場，睇到班連登仔眉飛色舞。霸戲哥就鍾意鮑姐、江美儀、袁文傑同秦啟維呢個演員配搭，就係差咁個鄭則士，集齊一套可以開拍《新肥貓正傳》。
林敏驄飾演車家，08年金融海嘯賣樓，結果一極追唔到樓價，上車夢越來越遠，呢個畸型樓市真係全世界獨有。套劇講中好多港人心聲，抽到公屋真係好過中六合彩，好似Bella同關曜儁呢對夫婦，寧願炒散都唔搵正職， 無謂入息過多要交雙倍租金。
有得住公屋固然係人生勝利組，這些機會不是屬於霸戲哥同豬視妹的。香港就係咁，努力搵錢嘅人，日做18小時，但冇機會申請公屋同居屋，要用血汗錢租私樓住；唔做嘢嘅人，日日hea足24小時，就可以住公屋做土皇帝。
呻完啦，冇咩事霸戲哥返出去開工先。
霸戲哥
** 博客文章文責自負,不代表本公司立場 **
最近Netflix靜咗排，好似冇乜好戲睇，而暫時熱播電影排首位嘅，係日本電影《噬謊者》，見佢短短哋個零鐘，姑且click入去睇睇。
套戲又係日本仔最愛嘅漫畫改編真人版電影，劇本都唔使寫，慳水慳力。故事主人翁斑目貘（橫濱流星）係天才賭神，精通各種賭術之餘，最叻其實係睇人眉頭眼額，一眼睇穿敵人心理，所以又被稱之為「噬謊者」。某日斑目貘遇上欠債廢青梶隆臣（佐野勇鬥 ），斑目貘聲稱可以幫對方還清債務，兩人就踏上亡命嘅賭博之旅。
有人話《噬謊者》橋段有啲似《賭博默示錄》，霸戲哥反而覺得更似《賭俠1999》嘅setting，都係「阿King」帶住「化骨龍」招搖撞騙，喺賭枱上懲治啲壞蛋。至於擔任花瓶角色嘅，係索女白石麻衣，佢扮演黑幫大家姐鞍馬蘭子，可惜略嫌密實咗少少噃。
套戲話就話係燒腦電影，但喺賭枱上鬥智鬥力嘅場面唔多，反而花太多時間去鋪排人物角色，可能驚觀眾同霸戲哥一樣，冇睇過原著啩。
整體嚟講，套戲又唔係外界講到咁差，用嚟消磨時間一流，不過如果要揀，霸戲哥都會揀番《賭俠1999》囉！
