博客文章
無綫另一齣台慶劇《下流上車族》，緊接《夢華錄》檔期，下周一八點半喺翡翠台播出。
個名聽落有少少似韓國電影《上流寄生族》，但講嘅係香港獨有嘅住屋問題，除非你係上流可以翹埋雙手錢滾錢，窮L如霸戲哥同豬視妹者，每天瞓醒就要為住屋問題而奔波。
除咗故事夠貼地，另一賣點就係處子拍劇嘅林敏驄。平時見親「藍猛衝」都係癲癲得得無厘正經，開口埋口蘇格蘭場非工業用國際線路，咁多年都冇乜點變。難得拍劇忽然變咗第二個人，睇預告仲有唔少內心戲添，令霸戲哥幾期待。
當然唔少得係扮演阿驄兩個女嘅郭柏妍同羅毓儀，兩位靚女咁快就有上位機會，希望佢哋好好把握啦。
同類型講上車嘅故仔都唔少，又即管睇吓呢套有咩驚喜。
霸戲哥
** 博客文章文責自負,不代表本公司立場 **
霸戲哥以前做報館，唔係日日都有大新聞可以做到頭條。好彩，外國媒體久唔久就搞啲好無謂嘅選舉，用嚟充撐場面就fit晒。
咁多年來，呢類選舉冇停過，仲與時並進添。最近就有個名為「最性感光頭男士」排行榜，由SEO機構Reboot 進行研究，聲稱透過面部黃金比例、Twitter流量同淨資產嘅數據作出分析而得出嘅結果。
賽果頭三名，分別係《Fast and Furious》嘅雲迪素、《屍中罪》男星Stanley Tucci、同美國男星Shemar Moore，而王儲威廉同大隻佬The Rock都只係分別排第5同第9。
光頭佬嚟講，霸戲哥認為籃球之神米高佐敦係光得嚟型棍嘅，不過佢就唔入榜，照計Twitter流量同淨資產都唔少吖，唔通面部黃金比例唔好？
唔知點解，華人光頭通常都唔太好睇，記得霸戲哥讀U某年足球比賽打入決賽，成team人要鏟個「champfight頭」，結果個頭鏟到成條魚咁，搞到要戴帽戴咗半年，樣衰到呢！
