霸戲哥之日常#457｜ 光頭佬選舉

霸戲哥以前做報館，唔係日日都有大新聞可以做到頭條。好彩，外國媒體久唔久就搞啲好無謂嘅選舉，用嚟充撐場面就fit晒。

咁多年來，呢類選舉冇停過，仲與時並進添。最近就有個名為「最性感光頭男士」排行榜，由SEO機構Reboot 進行研究，聲稱透過面部黃金比例、Twitter流量同淨資產嘅數據作出分析而得出嘅結果。

賽果頭三名，分別係《Fast and Furious》嘅雲迪素、《屍中罪》男星Stanley Tucci、同美國男星Shemar Moore，而王儲威廉同大隻佬The Rock都只係分別排第5同第9。

光頭佬嚟講，霸戲哥認為籃球之神米高佐敦係光得嚟型棍嘅，不過佢就唔入榜，照計Twitter流量同淨資產都唔少吖，唔通面部黃金比例唔好？

唔知點解，華人光頭通常都唔太好睇，記得霸戲哥讀U某年足球比賽打入決賽，成team人要鏟個「champfight頭」，結果個頭鏟到成條魚咁，搞到要戴帽戴咗半年，樣衰到呢！

霸戲哥

** 博客文章文責自負,不代表本公司立場 **

為迎接無綫55周年台慶，今晚深宵時段推出85年經典劇集《楊家將》。連「鎮倉之寶」都搬埋出嚟，都咪話唔震撼。

《楊家將》喎，霸戲哥真係細細個已聽過佢大名，但播出嗰陣得幾歲大，無綫五虎係乜都未知。今日有機會一睇，梗係唔會走寶啦。

無綫當年全台總動員出擊，靚仔靚女老戲骨乜都齊（演員list請自行Google)，其實就係為咗對撼亞視嘅第一屆亞洲小姐選舉。嗱，呢啲就真係叫電視大戰啦！

以霸戲哥對楊家將嘅認識，就係楊家三代死守邊關，男兒先後精忠報國，女兒披甲征戰，將遼軍殺個片甲不留，好不痛快。但無綫呢齣《楊家將》，仲加入埋玉皇大帝、華山老母同九天玄女等神話元素，cult味濃到呢！

套劇前後拍咗一個禮拜，雖然只得5集，但點都係一個創舉，亦見證當年電視業人才濟濟嘅輝煌歷史。