霸戲哥之日常#444｜ 楊家將

為迎接無綫55周年台慶，今晚深宵時段推出85年經典劇集《楊家將》。連「鎮倉之寶」都搬埋出嚟，都咪話唔震撼。

《楊家將》喎，霸戲哥真係細細個已聽過佢大名，但播出嗰陣得幾歲大，無綫五虎係乜都未知。今日有機會一睇，梗係唔會走寶啦。

無綫當年全台總動員出擊，靚仔靚女老戲骨乜都齊（演員list請自行Google)，其實就係為咗對撼亞視嘅第一屆亞洲小姐選舉。嗱，呢啲就真係叫電視大戰啦！

以霸戲哥對楊家將嘅認識，就係楊家三代死守邊關，男兒先後精忠報國，女兒披甲征戰，將遼軍殺個片甲不留，好不痛快。但無綫呢齣《楊家將》，仲加入埋玉皇大帝、華山老母同九天玄女等神話元素，cult味濃到呢！

套劇前後拍咗一個禮拜，雖然只得5集，但點都係一個創舉，亦見證當年電視業人才濟濟嘅輝煌歷史。

霸戲哥

** 博客文章文責自負,不代表本公司立場 **

人總有一死，說得容易，但如果你有絕症，只知最多10年命，面對死亡，又會唔會睇得咁開？

聽日上映嘅日本電影《餘命10年》，故事講述20歲少女高林茉莉（小松菜奈） 患上絕症，忍心放棄七情六慾，唔再對世界有任何留戀，令自己死得好過啲。偏偏呢個時候，遇上生無可戀嘅舊同學真部和人（坂口健太郎），譜出一段未開始已知會終結嘅愛情故事，重新確立生命嘅意義。

電影改編自已故作家小坂流加嘅同名小說，小坂流加患有罕見病「原發性肺動脈高血壓」（PPH），心肺功能只會越來越差，藥物只能夠延長壽命。作者將將自己對生命嘅態度同情感傾瀉喺故事之中，令套戲比一般催淚電影更加實在。最可惜係，小坂流加等唔到小說出版同電影推出，已經喺2017年離開人世。

無論你係貪生定戀死，都好應該入場睇呢齣戲，或者睇完會有所啟發。