博客文章
無綫台慶劇《美麗戰場》今周嚟到結局篇，全城等睇黑化阿寶大戰反骨琪。咁引人入勝嘅劇情，都要歸功於「MK活地阿倫」葉念琛。
劇集引起熱話，電影公司都拿拿臨食住條水，重新推出葉念琛套電影《致命24小時》，套戲原本係今年年初上映，但因為疫情關係延遲，一直未有映期。依家見葉念琛咁hit，就梗係打鐵趁熱，安排套戲喺11月2號上映都啱數。
由湯怡、吳卓羲、潘燦良主演嘅《致命24小時》，睇戲名就知係向葉玉卿同黃秋生主演嘅經典《盲女72小時》，都係講述盲女喺禁室被狂漢施暴嘅捉伊人遊戲，只係卿姐變咗湯怡，你就知要靠湯怡嘅演技去挽回分數嘞。
睇完trailer，霸戲哥最鍾意佢句宣傳口號：「不要把老婆獨留家中，否則後悔莫及！」
霸戲哥
** 博客文章文責自負,不代表本公司立場 **
台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。
葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。
但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。
葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。
留名等睇美麗殺戮戰場，反骨琪大戰黑化寶。
