霸戲哥之日常#470｜ 秋官嚟啦喂！

港股大跌市！恒指開市先失守16000點關口 ，其後跌幅擴大至逾千點，最後埋單15180點，跌1030點，全城彌漫一片愁雲慘霧，兩餸飯店排隊買單餸飯人龍激增；師奶阿伯個個黑口黑面，變晒計時炸彈一撻即爆咁款，距離如廁撈飯日子不遠矣。

霸戲哥太耐冇留意財經，講唔出有咩外來因素影響到個市跌成咁，但就係咁橋，無綫深宵時段重播劇《成吉思汗》噚晚播完，今晚緊接嘅就係鄭少秋主演嘅《大都會》，唔通跌市真係因為秋官效應？

唔好唔信邪，翻查資料，無綫今年4月重播秋官套《天地男兒》到七月大結局其間，美國標準普爾500指數共錄得20.56%跌幅，連帶香港股市樓市齊齊跌。

講番呢套《大都會》，佢係88年嘅金裝豪華短劇，演員陣容鼎盛，除咗鄭少秋，仲有汪明荃、梁朝偉、周星馳、呂良偉、林穎嫻同戚美珍添，真係粒粒皆星。

可惜嘅係，全劇只係得5集，電視迷肯定唔夠喉。但又咁講，套劇拿拿聲播完，唔知個市會唔會彈返上去呢？

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。